„Nýjungar í kennslu og rannsóknum“

„Það er heilmikð fjör í starfseminni,“ segir Víkingur Þór Gunnarsson, deildarstjóri Hestafræðideildar Háskólans á Hólum, í samtali við Guðbjörn Tryggvason. Fram undan eru  breytingar með auknu samstarfi við Háskóla Íslands og miklar framkvæmdir standa yfir á svæðinu fyrir Landsmót hestamanna sem fram fer í sumar.

Hestafræðideild Háskólans á Hólum fer dags daglega ekki varhluta af þeirri framþróun sem á sér stað í hestamennskunni. Að sögn Víkings eru um 60 nemendur í námi við deildina í vetur og ýmsar nýjungar og þróunarverkefni í gangi. Þar má meðal annars nefna járninganám sem hófst síðastliðið haust ásamt nýjungum í kennslu og rannsóknum.

Spennandi tækifæri í samstarfi við HÍ

Greint hefur verið frá því að Háskólinn á Hólum muni ganga til aukins samstarfs við Háskóla Íslands. Víkingur er afar bjartsýnn á þau tækifæri sem því fylgja:
„Þetta býður upp á ýmsa möguleika fyrir okkur. Við sjáum fram á samstarf við ýmsar deildir og fræðasvið háskólans. Þar má kannski sérstaklega nefna þett nýja svið sem við erum að fara inná um áhrif hesta á menn og hvernig megi hagnýta hestinn við ýmis konar þjálfun og endurhæfingu.“
Víkingur telur þó stærstu tækifærin liggja í því að efla samstarfið við menntavísindasvið og þróa námsframboðið enn frekar upp á meistarastig fyrir reiðkennara. Með samstarfinu fái Hólar aðgang að miklu stærra stoðkerfi en áður, á meðan Háskóli Íslands fái hreina viðbót við sitt námsframboð og fræðastarf. „Þarna græða báðir,“ segir Víkingur.

Landsmótssvæðið fær allsherjar andlitslyftingu

Landsmót hestamanna verður haldið á Hólum í sumar en tíu ár er síðan mótið var síðast haldið á staðnum. Undirbúningur er í fullum gangi og ljóst er að svæðið mun líta stórglæsilega út þegar gesti ber að garði.

• Nýtt efni á velli: Búið er að taka alla velli í gegn, skipta um efni og fegra þá.
• Upphitunarvöllur: Nýr völlur bætist við fyrir aftan aðalvöllinn.
• Aðgengi fyrir alla: Stöðugt er unnið að nýju plani sem ætlað er fyrir fatlaða.
• Viðhald fasteigna: Unnið er að því að dytta að húsum á svæðinu og hressa upp á útlitið.

„Svæðið verður enn öflugra og enn glæsilegra en síðast,“ segir Víkingur að lokum. Miðasala á mótið fer vel af stað og er mikill hugur í Hólamönnum að taka á móti hestamönnum úr öllum áttum í sumar.

Horfa má á viðtalið við Víking í heild sinni í spilaranum hér að ofan.