Nagli fór í 8,96 í úrslitum Hvítasunnumóts

Hvítasunnumóti eða gæðingamóti Fáks lauk í kvöld á úrslitum í A-flokki, þar sem Nagli frá Flagbjarnarholti stóð efstur með 8,96 í einkunn, setinn af Sigurbirni Bárðarsyni. Einungis tveimur kommum á eftir þeim varð Villingur frá Breiðholti í Flóa, sýndur af Sylvíu Sigurbjörnsdóttur.

Í B-flokknum var það hryssan Laufey frá Auðsholtshjáleigu sem sigraði, sýnd af Þórdísi Erlu Gunnarsdóttur og hlaut Laufey 8,691. Umræddur Sigurbjörn var þar með hestinn í öðru sæti, Hrafn frá Breiðholti í Flóa og einkunn þeirra var 8,686 og þar var það þriðji aukastafur sem réði sætaröðun.

Á mótinu var keppt í A og B-flokki í opnum flokki, áhugamannaflokki og ungmennaflokki. Mótið gekk í heildina mjög vel, sterk úrslit fór fram í öllum flokkum í dag og veðrið var með besta móti á úrslitadaginn.

Það eru verðmæti í félagsmótum eins og Hvítasunnumóti Fáks og gaman að halda í hefðir og fagna góðum dögum við að horfa á góða hesta, flinka knapa og hitta kunningjana. Eins og alltaf felast verðmætin í fjölbreyttum hópi fólks; keppendum, aðstandendum, almennum gestum, sjálfboðaliðum og dómurum sem koma saman á viðburði sem þessum, af einskærum áhuga og ástríðu fyrir hestinum.

Til hamingju með frábært mót Fáksmenn!

Meðfylgjandi eru allar niðurstöður mótsins.