Allt getur gerst í keppni kvöldsins

Í kvöld fer fram annað mótið af þeim sex sem framundan eru í Meistaradeild Líflands í hestaíþróttum árið 2021. Keppt er í slaktaumatölti og hefst keppni klukkan 20:05. Áhorfendur munu áfram þurfa að horfa á mótið heima í stofu og er allt í beinni á RÚV2.

Margir frábærir keppendur eru á ráslistanum og er ekki úr vegi að rýna í hann og velta því fyrir sér hvaða knapar teljast sigurstranglegir í kvöld.

Á ráslista má t.d. sjá tvö pör sem hafa sigrað þessa grein á Íslandsmóti en það eru þau Elin Holst og Frami frá Ketilsstöðum sem hlutu 8,88 í úrslitum árið 2016 og Helga Una Björnsdóttir og Þoka frá Hamarsey sem urðu Íslandsmeistarar árið 2019 með 8,25 í einkunn.

Alls voru átta knapar í úrslitum í þessari grein árið 2020 og eru fimm þeirra með sömu hesta og í fyrra. Þetta eru Teitur Árnason og Brúney, sem unnu þessa grein í fyrra, Arnar Bjarki Sigurðarson og Hrafnfaxi, sem urðu í öðru sæti. Viðar Ingólfsson og Skál frá Skör, sem enduðu í fjórða, áður nefnd Helga Una og Þoka sem urðu í sjötta sæti og Jóhanna Margrét Snorradóttir og Bárður sem urðu í áttunda sæti.

Af öðrum knöpum sem eru á ráslista verður að nefna Aðalheiði Önnu Guðjónsdóttur og Óskar frá Breiðstöðum sem hafa verið ákaflega sigursæl í þessari grein og er engu logið þegar sagt er að þau hafi verið langefst á stöðulistum ársins 2020 með 8,63 í einkunn í forkeppni. Jakob Svavar Sigurðsson er einnig vel hestaður en hann mætir með Kopar frá Fákshólum en þeir eiga þriðju hæstu einkunn ársins í fyrra 7,70.

Í keppni sem þessari þar sem lítið má fara úrskeiðis er þó stutt á milli þess að knapar slái í gegn og þeir skjótist upp á toppinn eða þá að dýrkeypt mistök verði til þess að gera úti um vonir þeirra. Það verður því spennandi að fylgjast með keppni kvöldsins þar sem allt getur gerst.