Þórarinn og Þráinn sigurvegarar kvöldsins í Meistaradeild KS

Fimmgangskeppni í Meistaradeild KS í hestaíþróttum fór fram í kvöld í Svaðastaðahöllinni á Sauðárkróki. Fyrir kvöldið ríkti mikil spenna á meðal hestamanna því hver gæðingurinn á fætur öðrum var skráður til leiks. Áhorfendur urðu ekki sviknir af því sem fram fór og mörg frábær tilþrif sáust. Blaðamaður Eiðfaxa fylgdist spenntur með keppninni í beinni útsendingu á TindastóllTV.

Að lokinni forkeppni var það sigurvegari síðasta árs í þessari grein Bjarni Jónasson og Harpa Sjöfn frá Hvolsvelli sem að leiddu með einkunnina 7,17 í öðru sæti var Valdís Björk og Fjóla frá Eskiholti með 7,10 og í því þriðja Þórarinn Eymundsson og Þráinn frá Flagbjarnarholti með 7,03. Auk þess unnu sér þátttökurétt í A-úrslitum þær Randi Holaker á Þyt frá Skáney og Mette Mannseth með Kalsa frá Þúfum.

Í A-úrslitunum léku knapar svo við hvurn sinn fingur og keppnin var spennandi. Það fór svo að Þórarinn Eymundsson og Þráinn fóru með sigur úr býtum með glæsilega einkunn, 7,50. Jöfn í 2-3 sæti með 7,33 í einkunn voru þau Valdís Björk og Fjóla og Bjarni Jónasson og Harpa Sjöfn.

Í B-úrslitum voru einnig frábær pör en þar fór það svo að Agnar Þór og Leynir frá Garðshorni á Þelamörk og Gísli Gíslason á Trymbli frá Stóra-Ási urðu jafnir með 7,07 í einkunn en Agnar Þór vann á sætaröðun dómara.

Stigahæsta lið kvöldsins var lið Storm Rider.

Heildarniðurstöður kvöldsins eru hér fyrir neðan.