Sex hross hlutu 1.verðlaun á Margaretehof

Kynbótasýningu á Margaretehof í Svíþjóð lauk nú rétt í þessu með yfirlitssýningu. Alls voru 37 fullnaðardómar felldir og þess til viðbótar voru 5 hross dæmd í sköpulagi.Sex hross hlutu aðaleinkunn yfir 8,00 eða hærra og 1.verðlaun.

Hæst dæmdi stóðhestur sýningarinnar er sjö vetra gamall og heitir Barón fra Limfjorden undan Prins fra Knutshyttan og Rósu fra Limfjorden en sú er undan Álfasteini frá Selfossi og Stoð frá Kjarri. Hlaut Barón 8,40 fyrir sköpulag, 8,28 fyrir hæfileika og 8,32 í aðaleinkunn. Eigandi hans er Michael Høj Lomborg en sýnandi var Agnar Snorri Stefánsson.

Agnar Snorri situr á Baróni hæst dæmda stóðhesti sýningarinnar

Hæst dæmda hryssa sýningarinnar var Berglín frá Bergi sem er 8.vetra gömul hryssa ræktuð af Önnu Dóru Markúsdóttur. Hlaut hún 8,21 fyrir sköpulag, 7,93 fyrir hæfileika og 8,03 í aðaleinkunn. Hún er undan Arion frá Eystra-Fróðholti og Brá frá Bergi. Sýnandi Berglínar var Sigurjón Örn Björnsson.

Önnur hross sem hlutu 1.verðlaun voru Frami fra Ulbæk sem er 6.vetra gamall og hlaut hann 8,15 í aðaleinkunn, Undri frá Sólvangi sem er 8.vetra gamall og hlaut 8,04 í aðaleinkunn, Dama frá Ulbæk sem er 5.vetra og hlaut 8,02 í aðaleinkunn og Kjarkur frá Lækjamóti sem hlaut 8,0 í aðaleinkunn.

Öll sýnd hross á Margreterhof