Tæplega 30 hross hlutu 1.verðlaun á Hólum

Kynbótasýningu lauk í dag á Hólum í Hjaltadal þar sem 90 hross mættu til dóms. Valberg Sigfússon, Elisabeth Trost og Óðinn Örn Jóhannsson skipuðu dómnefndina sem þar starfaði. Fjöldi álitlegra hrossa kom fram og hlutu 28 þeirra 8,00 eða hærra og 1.verðlaun.

Hæst dæmdi stóðhestur sýningarinnar heitir Spennandi frá Fitjum og er sjö vetra gamall. Hann er undan Smára frá Skagaströnd og Spennu frá Krithóli, ræktendur hans og eigendur eru Ragnhildur Halldórsdóttir og Valdimar Bjarnason. Hæst hlaut hann einkunnina 9,0 fyrir samstarfsvilja og fet en auk þess skartar hann 10,0 fyrir prúðleika. Sýnandi var Bjarni Jónasson.

Dís frá Ytra-Valllholti er eftirtektarverð hryssa en hún er eingöngu 5.vetra gömul en hlaut frábæran hæfileikadóm. 9,5 fyrir samstarfsvilja og greitt stökk og 9,0 fyrir tölt,brokk, fegurð í reið og fet. Dís er undan Kyndli frá Ytra-Vallholti og Gyðju frá Ytra-Vallholti. Eigandi og ræktandi er Vallholt ehf.

Elva frá Miðsitju hlaut hæsta aðaleinkunn hryssna á sýningunni 8,32 en Bjarni Jónsson sýndi hana líkt og Spennanda. Elva er 11.vetra gömul undan Vafa frá Ysta-Mó og Elju frá Ytri-Hofdölum. Ræktandi er Magnús Andrésson en eigandi Anja Meier-Egger.

Öll dæmd hross raðað eftir aðaleinkunn