Fyrstu kynbótasýningu ársins hér á landi lokið

Fyrstu kynbótasýningu ársins hér á landi er lokið. Sýningin fór fram á Hellu og hófst hún á mánudaginn og lauk með yfirlitssýningu í dag.

Alls voru 27 hross sýnd í fullnaðardómi og fóru 16 þeirra í 1. verðlaun.

Hæst dæmdi stóðhestur sýningarinnar og hæst dæmda hross sýningarinnar er hinn 6 vetra gamli Magni frá Stuðlum. Hann hlaut fyrir sköpulag 8,72, fyrir hæfileika 8,47 sem gerir 8,56 í aðaleinkunn. Magni var hæst dæmdi fimm vetra hesturinn í fyrra og hækkaði hann á sýningunni en áður var hann með 8,52 í aðaleinkunn. Árni Björn Pálsson sýndi klárinn en Magni er undan Konsert frá Hofi og Stöku frá Stuðlum. Ræktandi Magna er Páll Stefánsson og Edda Björk Ólafsdóttir en eigendur eru þau ásamt Hrafnkeli Áka Pálssyni og Ólafi Tryggva Pálssyni. Magni hlaut m.a. 9,5 fyrir skeið og 9,0 fyrir samstarfsvilja, samræmi, fótagerð, hófa og prúðleika.

Magni frá Stuðlum hlaut 9,5 fyrir skeið en hann var sýndur af Árna Birni Pálssyni. Mynd: Nicki Pfau

Hæst dæmda hryssa sýningarinnar var Þyrnirós frá Rauðalæk, 7 vetra Sjóðsdóttir og undan Logadís frá Syðra-Garðshorni. Ræktandi Þyrnirósar er Pabbastrákur ehf. og eigandi Takthestar ehf. en á bakvið Takthesta eru þau Guðmundur Björgvinsson og Eva Dyröy. Guðmundur sýndi hryssuna og hlaut hún fyrir sköpulag 8,76, fyrir hæfileika 8,42 sem gerir 8,54 í aðaleinkunn. Hryssan hlaut m.a. 9,0 fyrir samstarfsvilja, háls, herðar og bóga, samræmi, prúðleika og bak og lend.

Þá var hinn fjögurra vetra Hraunhamar frá Ragnheiðarstöðum sýndur en hann hlaut 8,15 í aðaleinkunn, en hann er sýndur sem klárhestur. Hann hlaut m.a. 9,0 fyrir tölt, greitt og hægt stökk, fegurð í reið og háls, herðar og bóga.

Hér fyrir neðan eru hrossin sem sýnd voru á sýningunni

‘