Gandi mældist 157 cm. á herðar

Í gær hófst kynbótasýning á Hellu og stendur hún yfir þangað til á laugardag, 4. júní, en þá er yfirlit. 175 hross eru skráð á sýninguna og þegar þetta er ritað hafa 44 hross hlotið fullnaðardóm, þar af 23 fyrstu verðlaun.

Dómarar á sýningunni eru þau Elsa Albertsdóttir, Elisabeth Jansen og Gísli Guðjónsson.

Efstur, eins og er, er Gandi frá Rauðalæk en Gandi komst í fréttirnar í fyrra þegar hann setti heimsmest í hæð á herðar en þá mældist hann 156 cm. á herðar. Samkvæmt sýnenda Ganda, Guðmundi Björgvinssyni, mældist Gandi hærri í gær eða 157 cm og hefur því bætt eigið heimsmet. Ekki var hægt að skrá hæðina í WorldFeng en það mætti segja að Gandi hafi „sprengt“ skalann. Gandi er þó ekki einungis hár á herðar heldur einnig afar vel skapaður með 8,84 fyrir sköpulag, þar af 9,5 fyrir samræmi og 9,0 fyrir háls, herðar og bóga, bak og lend og hófa. Gandi hlaut 8,49 fyrir hæfileika sem gerir 8,62 í aðaleinkunn. Gandi er undan Konsert frá Hofi og Garúnu frá Árbæ.

Efstu hryssurnar á sýningunni, þegar þetta er ritað, eru þær Þyrnirós frá Ragnheiðarstöðum og Hildur frá Fákshólum en báðar hafa þær hlotið 8,45 í aðaleinkunn. Þyrnirós er 7 vetra en hún hlaut fyrir sköpulag 8,81 og fyrir hæfileika 8,25. Þyrnirós var sýnd af Jakobi Svavari Sigurðssyni og er hún undan Herkúles frá Ragnheiðarstöðum og Þrumu frá Hólshúsum.

Hildur hlaut fyrir sköpulag 8,67, fyrir hæfileika 8,32 sem gerir í aðaleinkunn 8,45. Hildur er 5 vetra undan Ölni frá Akranesi og Gnýpu frá Leirulæk. Hildur var sýnd af Helgu Unu Björnsdóttur.