Síðasta vikan af vorsýningum

Síðasta vika vorsýninga er gengin í garð en sýnt er á fjórum stöðum; Selfossi, Hafnarfirði, Hólum og Hellu. Hægt er að nálgast dóma á öllum þessum sýningum inn á WorldFeng.

Efst á Selfossi eins og er er hin sjö vetra Ísdís frá Árdal en hún hlaut fyrir sköpulag 8,34, fyrir hæfileika 8,64 og í aðaleinkunn 8,54. Það var Ragnhildur Haraldsdóttir sem sýndi hryssuna. Ísdís er undan Sprota frá Innri-Skeljabrekku og Ísbrún frá Syðstu-Fossum.

Fróði frá Flugumýri stóð efstur fjögurra vetra stóðhesta í fyrra en hann var sýndur aftur í dag á Selfossi. Hann bætti töluvert við sig og er nú með 8,64 fyrir sköpulag og 8,39 fyrir hæfileika sem gerir 8,48 í aðaleinkunn. Það var ræktandi hans og eigandi Eyrún Ýr Pálsdóttir sem sýndi Fróða. Fróði er undan Hring frá Gunnarsstöðum I og Fýsn frá Feti.

Efst á Hólum er Birta frá Íbishóli sýnd af Guðmari Frey Magnússyni. Birta hefur hlotið fyrir sköpulag 8,14, fyrir hæfileika 8,37 sem gerir 8,29 í aðaleinkunn. Birta er 6 vetra undan Snillingi frá Íbishóli og Seylu frá Efra-Langholti.

Telma frá Árbakka stendur efst á sýningunni á Hellu en hún hefur hlotið fyrir sköpulag 8,23 og fyrir hæfileika 8,83 sem gerir 8,62 í aðaleinkunn. Hinrik Bragason sýndi Telmu en Telma er undan Framherja frá Flagbjarnarholti og Emblu frá Oddgeirshólum.

Í Hafnarfirði er efstur Seðill frá Árbæ en Seðill var hæst dæmdi sex vetra stóðhesturinn í fyrra. Seðill bætti töluvert við sig bæði í sköpulagi og hæfileikum en fyrir sköpulag hlaut hann 8,79 og fyrir hæfileika 8,72. Það gerir 8,75 í aðaleinkunn en það var Árni Björn Pálsson sem sýndi hestinn. Seðill er undan Sjóði frá Kirkjubæ og Veronu frá Árbæ.