Sleipnisbikarinn nú á Hólum

29. október 2022
Fréttir

Ný heimkynni æðstu viðurkenningar í íslenskri hrossarækt

Í gær undirrituðu Bændasamtök Íslands og Háskólinn á Hólum með sér samkomulag um að Hólaskóli varðveiti Sleipnisbikarinn fyrir Bændasamtökin á milli Landsmóta við hátíðlega athöfn á Hólum.

Rektor Háskólans á Hólum, Hólmfríður Sveinsdóttir og formaður Bændasamtaka Íslands, Gunnar Þorgeirsson fóru með stutt ávörp áður en samkomulagið var undirritað. Að því loknu var boðið upp á kaffi í húsakynnum háskólans.

Sleipnisbikarinn er æðsta viðurkenning sem veitt er í hrossarækt en bikarinn hlýtur sá stóðhestur sem efstur stendur í heiðursverðlaunum fyrir afkvæmi á Landsmóti. Bikarinn verður áfram í eigu Bændasamtaka Íslands en kemur það í hlut Háskólans á Hólum að varðveita bikarinn. Bikarinn kemur til með að vera í sýningarsal Söguseturs íslenska hestsins á Hólum þar sem nú er uppi sýningin „uppruni kostanna“. Þannig geta nemendur, kennarar sem og annað áhugafólk um hrossarækt skoðað bikarinn þegar það heimsækir Hóla.

Inn á vef Bændasamtakanna er hægt að lesa sögu bikarsins en talið er að bikarinn hafi verið smíðaður í London á tímabilinu 1837 – 1901. Þó hefur hann ekki verið smíðaður eftir 1857 þar sem á honum er skjöldur sem gefur til kynna að hann kynna að hann hafi verið notaður sem verðlaunagripur árið 1857 í Malton kappreiðum í norðanverðu Yorkshire-héraði.

Í lok seinni heimsstyrjaldarinn var bikarinn seldur á uppboði og var kaupandinn íslenskur sem flutti hann með sér til Íslands þar sem hann fékk það staðfest að gripurinn væri mjög verðmætur en hann er gerður úr fjórum kílóum af hreinu silfri. Bikarinn var síðar keyptur af íslenska ríkinu og Búnaðarfélagi íslands sem hefur alla tíð varðveitt og annast bikarinn þar til nú.

„Sleipnisbikarinn er farandbikar og þeir sem hljóta hann fá gripinn afhentan við hátíðlega athöfn, þar eru teknar myndir af sigurvegaranum, stóðhestinum sjálfum, afkvæmahópnum, eiganda og ræktanda. Í framhaldinu er bikarinn tekur aftur, eigandi stóðhestsins fær skjal með mynd af bikarnum til staðfestingar á árangrinum en bikarinn er fluttur aftur á sinn varðveislustað þar sem hann er geymdur öruggur í læstum glerskáp,“ segir á síðu BÍ.

Það var Skuggi frá Bjarnanesi sem fékk bikarinn fyrstur en það var árið 1947 á Landbúnaðarsýningu í Reykjavík. Á þeirr sýningu kepptu stóðhestar í tveimur flokkum; vinnuhross og reiðhross. Hlaut Skuggi viðurkenninguna sem besti stóðhesturinn í flokki reiðhesta. Bíkar var veittur í annað sinn á fyrsta Landsmótinu, 1950, en það var Hreinn frá Þverá sem vann sér inn viðurkenninguna, en hann er sá hestur sem hefur hlotið viðurkenninguna oftast, alls þrisvar sinnum. Eftir það var reglunum breytt og getur enginn stóðhestur hlotið viðurkenninguna oftar enn einu sinni. Bikarinn hefur verið veittur 26 sinnum en hér fyrir neðan er listi yfir þá stóðhesta sem hafa hlotið bikarinn.

Sleipnisbikarhafar

1947: Skuggi frá Bjarnanesi, eigandi: Hestamannafélagið Faxi Borgarfirði

1950: Hreinn frá Þverá, eigandi: Hannes Stefánsson, Þverá Skagafirði

1954: Hreinn frá Þverá, eigandi: Hrossakynbótabú ríkisins, Hólum í Hjaltadal

1958: Hreinn frá Þverá, eigandi: Hrossakynbótabú ríkisins, Hólum í Hjaltadal

1962: Svipur frá Akureyri, eigandi: Haraldur Þórarinsson, Syðra-Laugalandi Eyjafirði

1966: Roði frá Ytra-Skörðugili, eigandi: Hrossaræktarsamband Vesturlands

1970: Neisti frá Skollagróf, eigandi: Jón Sigurðsson, Skollagróf

1974: Blesi frá Núpakoti, eigandi: Hrossaræktarsamband Suðurlands

1978: Sörli frá Sauðárkróki, eigandi: Sveinn Guðmundsson, Sauðárkróki

1982: Hrafn frá Holtsmúla, eigandi: Félagsbúið Holtsmúla, Skagafirði

1986: Ófeigur frá Hvanneyri, eigandi: Hrossaræktarsamband Vesturlands