Frauke Schenzel og Jódís vom Kronshof efstar

Það styttist í Heimsmeistaramótið í Hollandi í ágúst en nú eru 11 dagar þangað til að mótið formlega hefst. Gaman er að glugga í WR listana og sjá hvaða knapar hafa verið að ná hæstu einkunnum í hverri grein. WR listinn er byggður á þremur hæstu einkunnunum sem knapi og hestur hafa náð sér í á WR mótum síðustu tvö ár.

Frauke Schenzel og Jódís vom Kronshof eru efstar á WR listanum í fjórgangi V1 með meðaltalið 8,10. Þær munu keppa fyrir hönd Þýskalands á mótinu.

Hæsta einkunnina sem gefin hefur verið í forkeppni síðustu tvö ár á WR móti er 8,27 og það var Nils Christian Larsen á Flaumi frá Sólvangi sem fékk þá einkunn. Nils er skráður með Flaum sem varahest en annars mætir hann á, Gust vom Kronshof, í fimmganginn. Norðmenn senda þó annað sterkt par en Anne Stine Haugen á Hæmi frá Hyldsbæk keppa fyrir Noreg og eru þau í öðru sæti á WR listanum. Þau hafa hlotið hæstu einkunnina af öllum í forkeppni á þessu ári eða 8.20.

Jóhanna Margrét Snorradóttir og Bárður frá Melabergi munu keppa í fjórgangi fyrir Íslandshönd en þau eru í sjöunda sæti á listanum. Ef árslistinn er skoðaður eru þau í fjórða sæti á honum. Líklegt þykir að Viðar Ingólfsson og Þór frá Stóra-Hofi mæti líka í fjórganginn en þeir hafa ekki keppt í þeirri grein áður.

WorldRanking listi FEIF