Jón Stenild og Eilífur fra Teglborg efstir

Það styttist í Heimsmeistaramótið í Hollandi í ágúst en nú eru 12 dagar þangað til að mótið formlega hefst. Gaman er að glugga í WR listana og sjá hvaða knapar hafa verið að ná hæstu einkunnum í hverri grein. WR listinn er byggður á þremur hæstu einkunnunum sem knapi og hestur hafa náð sér í á WR mótum síðustu tvö ár.

Jón Stenild og Eilífur fra Teglborg eru ríkjandi heimsmeistarar í fimmgangi F1 og tróna á toppnum á WR listanum í fimmgangi F1 með meðaltalið 7,90. Þeir hafa einnig hlotið hæstu einkunn í forkeppni sem gefin hefur verið síðustu tvö ár á WR móti eða 8,00.

Það verður gaman að fylgjast með fimmgangnum á Heimsmeistaramótinu en þar keppa fyrir Íslandshönd Sara Sigurbjörnsdóttir á Flóka frá Oddhóli (6 á WR listanum) og Þorgeir Ólafsson á Goðasteini frá Haukagili á Hvítársíðu (11 á WR listanum).

Í ár hafa þeir Pierre Sandsten Hoyos á Búa frá Húsavík og Jón á Eilíf hlotið hæstu einkunn í forkeppni eða 7,87. Sara og Flóki eru í fjórða sæti á árslistanum og Þorgeir og Goðasteinn í því sjöunda.

WorldRanking listi FEIF