Elva og Goði hlutskörpust

Keppni í gæðingalist hjá Meistaradeild Ungmenna og Topreiter fór fram í reiðhöll Harðar í Mosfellsbæ föstudagskvöldið 13.mars. Alls mættu til leiks 39 pör og því fróðlegt og spennandi að fylgjast með þessum pörum, takast á við krefjandi verkefni.
Keppnin var afar jöfn og spennandi, þar sem margir knapar sýndu glæsilegar sýningar og ljóst að framtíð íslenskrar hestamennsku er björt með þennan sterka hóp ungra knapa.

„Við viljum færa Hestamannafélaginu Herði kærar þakkir fyrir frábært samstarf og Blíðubakkahúsinu sérstakar þakkir fyrir lánið á reiðhöllinni til upphitunar sem skipti sköpum fyrir gott skipulag mótsins,“ segir í tilkynningu frá stjórn Meistaradeildar ungmenna. „Styrktaraðilar Gæðingalistarinnar voru Heimahagi og Hraunhamar fasteignasala og þökkum við þeim bestu þakkir fyrir stuðninginn.“

Það voru þau Elva Rún Jónsdóttir og Goði frá Garðabæ sem báru sigur úr býtum með sýningu uppá 7,17. Í öðru sæti varð Eva Kærnested og Styrkur frá Skák með einkunnina 7.0. Stutt á eftir í þriðja sæti voru það Lilja Rún Sigurjónsdóttir og Djásn frá Skógarnesi með einkunnina 6,90.

Myndband á sýninguna

Kvöldið gekk þó ekki áfallalaust fyrir sig. Mikil nákvæmisvinna er í undirbúning fyrir gæðingalist og má lítið útaf bera. Þá varð til þess þetta kvöld að ekki fengu allir knapar sína lokaeinkunn og þurfti því stjórn tíma til að koma einkunnum og skjölum í rétt horf áður en niðurstöður gátu verið birtar með fullri vissu að allt sé rétt. Því fór svo að engin verðlaun voru veitt þetta kvöld en verður afhent í næstu keppni sem verður fimmtudaginn 26.mars þegar fram fer keppni í slaktaumatölti í Samskipahöllinni hjá Hestamannafélaginu Sprett.