Heilbrigðisskoðun keppnis- og kynbótahrossa á Landsmóti

Lögbundin heilbrigðisskoðun sýninga- og keppnishrossa á stórmótum verður framkvæmd fyrir eftirfarandi greinar á LM 2022:

• Milliriðla í A fl. gæðinga, B fl. gæðinga og ungmennaflokki
• Úrslit í A fl. gæðinga, B fl. gæðinga og ungmennaflokki
• Forkeppni í F1, V1, T1 og T2
• Úrslit í F1, V1, T1 og T2
• Verðlaunaafhendingu kynbótahrossa

Hrossin skulu mæta til skoðunar allt að tveimur dögum fyrir hverja keppnisgrein /sýningu (sjá skipulag hér að neðan), með þeirri undantekningu að skoðun fyrir B úrslit gæðingakeppninnar (A-fl, B-fl og ungmennaflokk) fer fram að morgni keppnisdags (fimmtudags). Ennfremur skulu þeir stóðhestar sem fylgja feðrum sínum til heiðursverðlauna koma til skoðunar strax eftir það (laugardag kl 12:00).

Hrossin skulu mæta með múl en án ábreiðu. Mikilvægt er að aðeins ein manneskja fylgi hverjum hesti, knapi, eigandi eða aðstoðarmaður.

Heilbrigðisskoðunin felur í sér eftirfarandi atriði:

• Skoðun á almennu ástandi (holdafari, eitlum, öndun auk líkamshita og hjartahljóða ef ástæða er til)
• Skoðun á fremsta hluta munnsins. Tungan tekin til hliðar (án deyfingar)
• Fætur þreifaðir og heltiskoðun (hreyfingar á feti og brokki á hörðu undirlagi)

Ef einhver eftirfarandi atriða finnast er hestur dæmdur „óhæfur til sýningar eða keppni” og fær ekki að fara inn á keppnisvöllinn:

• Vansæld og/eða veikindi
  • Horaður (undir 2,5 í holdastigun), hiti, óeðlileg öndun og hjartahljóð, áberandi bólgnir eitlar, áberandi hósti og/eða mikil graftarkennd útferð úr nösum
• Alvarlegir áverkar í munni
  • Sár í gegnum slímhúð í kinnum, munnvikum og tungu, stærri en 1 sm, eða aum og bólgin sár
  • Sár í gegnum slímhúð á tannlausa bilinu
  • Áberandi bólga og/eða eymsli á tannlausa bilinu og framan við fremsta jaxl Bólga tengd beinhimnu eða beini
  • Keðjusár í gegnum húð, stærri en 1 sm, eða aum og bólgin sár
• Alvarlegir áverkar á fótum
  • Bólga og eymsli í sinum og/eða böndum (kvíslböndum, stuðningsböndum, liðböndum)
  • Bólga í sinaslíðri, beinhimnu, liðum og hófum tengd vægri helti
  • Alvarleg ágrip á fótum (sár í gegnum húð, 1 sm eða stærri)
  • Minni sár í gegnum húð með greinilegum eymslum og bólgu í vefjum undir húð, hófhvarfi eða hælþófum
  • Önnur stærri sár á húð
  • Alvarlegt múkk, umfangsmikið og/eða aumt Helti
• Annað sem að mati dýralæknis mótsins eða dómnefndar gerir hross óhæft til sýningar eða keppni

Niðurstaða um að hestur sé „óhæfur til keppni“ er tilkynnt yfirdómara / sýningarstjóra. Hestur sem hefur verið dæmdur „óhæfur til keppni“ í einni grein má ekki keppa í neinu öðru né koma fram á nokkurri sýningu á sama móti.

Skoðunarplan

*Stóðhestar sem fylgja feðrum sínum til heiðursverðlauna