Nokkrar 9,5 hafa litið dagsins ljós

Vika tvö á Hellu er rúmlega hálfnuð en yfirlit er á laugardaginn. Eins og áður hefur komið fram eru dómarar þau Elsa Albertsdóttir, Elisabeth Jansen og Gísli Guðjónsson en 192 hross eru skráð á sýninguna.

Tvær 10 hafa litið dagsins ljós í sköpulagsdómum en Skýssonurinn, Grettir frá Ásbrú, hlaut 10 fyrir prúðleika og glæsihryssan Valdís frá Auðsholtshjáleigu 10 fyrir höfuð.

Efst á sýningunni er Álfamær frá Prestsbæ en hún er 7 vetra undan Spuna frá Vesturkoti og Þóru frá Prestsbæ. Fyrir hæfileika hlaut hún 8,95 og fyrir sköpulag 8,59 sem gerir 8,82 í aðaleinkunn. Það var Árni Björn Pálsson sem sýndi hryssuna.

Nokkrar 9,5 hafa verið gefnar fyrir einstaka eiginleika í hæfileikum. Álfamær hlaut 9,5 fyrir skeið og samstarfsvilja. Ómsdóttirin Kastanía frá Kvistum hlaut 9,5 fyrir tölt, samstarfsvilja og hægt tölt og Herkúlesardóttirin Þyrnirós frá Ragnheiðarstöðum hlaut 9,5 fyrir fegurð í reið.

Þegar rennt er yfir dómaskrána er áberandi að í flokki 5 vetra hryssna standa þar efstar fjórar hryssur allar frá Fákshólum. Hildur frá Fákshólum er efst í flokknum með 8,45 í aðaleinkunn en hún er undan Ölni frá Akranesi og Gnýpu frá Leirulæk, sýnd af Helgu Unu Björnsdóttur. Önnur er Hrönn frá Fákshólum með 8,37 í aðaleinkunn undan Kiljani frá Steinnesi og Adömu frá Búrfelli, sýnd af Jakobi Svavari Sigurðssyni. Þriðja er Hrefna undan Hraunari frá Hrossahaga og Gloríu frá Skúfslæk en hún hlaut 8,24 í aðaleinkunn, klárhryssa. Jakob sýndi hana líka og Hryðju frá Fákshólum sem er fjórða með 8,20 í aðaleinkunn, klárhryssa. Hryðja er undan Ský frá Skálakoti og Mirru frá Þúfu í Landeyjum.

Hross sem hlotið hafa fullnaðardóm á sýningunni