Nýr Eiðfaxi

Fjörugar umræður fóru fram á Landsþingi LH sem haldið var á Reykjavík Hótel Natura þann 19. og 20. október sl. Eiðfaxi fylgdist með hestamönnum á rökstólum og eru helstu hitamál þingsins krufin í blaðinu. Gunnar Steinn Pálsson ritar grein sem varpar skýru ljósi á innihald erindis er hann hélt á þinginu.

 

Þá er Kristbjörgu Eyvindsdóttur er heitt í hamsi þegar hún spyr hvort hrossaræktin sé á réttri leið. Þar kallar hún eftir viðhorfsbreytingum forsvarsmanna greinarinnar, endurskoðun dómkerfis og siðareglum meðal dómara.  

 

Allt stefnir í stöðnun á rannsóknum á sumarexemi vegna fjárskorts. Sigurbjörg Þorsteinsdóttir og Vilhjálmur Svansson rita grein um rannsóknina en sumarexem hamlar markaðssetningu og útflutning á íslenskum hrossum frá Íslandi.

 

Nafn hrossaræktarstöðvarinnar Sunnaholts hefur borið oft á góma hestamanna undanfarið ár. Hross í eigu þess hafa vakið eftirtekt á sýningum og mótum og fréttir af kaupum Sunnaholts á fleiri hrossum hafa ratað í ljósvakamiðla. Færri þekkja til fólksins að baki nafninu en hjónin Steffan og Angelika Langaard eru í einlægu viðtali í Eiðfaxa.

 

Nú er tími frumtamninga og Gísli Gíslason á Þúfum ræðir ferli fortamninga og aðferðir við frumtamningar í blaðinu.

 

Í ár uppfylla níu hryssur lágmörk til heiðursverðlauna og eru þar á meðal mæður verðlaunaðra kynbótahrossa, sigursælla keppnishesta og vinsælla stóðhesta. Í blaðinu er umfjöllun um heiðursverðlaunahryssurnar 2012 og prýðir Glettubikarhafinn Þoka frá Hólum forsíðu blaðsins að þessu sinni. Hrafnhildur Helga Guðmundsdóttir myndaði drottninguna í Skagafirði á haustdögum ásamt folaldinu Þökk frá Hólum.