Rekur stóðhestamiðstöð í Danmörku

Eiðfaxi heldur áfram að kynna lesendur fyrir íslendingum sem búa erlendis en næsti viðmælandi er Hildur Sigmarsdóttir. 

Hildur er fædd og uppalin í Vestmannaeyjum og býr nú ásamt fjölskyldunni sinni rétt norðan við Aarhus í Balle á Jótlandi, Danmörku. Þar býr hún með kærasta sínum Jesper Borup og börnum sínum Freyju (15 ára) og Noah (14 ára) á búgarðinum Stutteri Frisendal. “Við erum með ca. 30 – 40 hross á búgarðinum en ég er sú eina sem stunda hestamennsku í fjölskyldunni, þó Jesper hjálpi mér mikið. Ég rek mitt eigið fyrirtæki og er aðallega í að temja, þjálfa, kenna, dæma og rækta hross,” segir Hildur en hún er lærður sjúkraliði ásamt því að hafa útskrifast sem tamningamaður og reiðkennari frá Háskólanum á Hólum árið 1999. Hildur starfaði við tamningar og þjálfun á Íslandi en það var þó ekki íslenski hesturinn sem dró hana út. “Ég kynntist kærastanum mínum þegar hann var í fríi á Íslandi og ákvað í kjölfarið að flytja út. Ég hef ekki flutt heim aftur.”

Hildur hefur byggt upp aðstöðuna í Frisendal ásamt Jesper en þar er stórt hesthús ásamt stóðhestamiðstöðu en á hverju sumri koma u.þ.b. 70 – 100 hryssur á staðinn. “Ég er mjög stolt af því að hafa byggt þetta upp sjálf. Venjulegur dagur í mínu lífi er umvafinn hestum en á veturnar er ég mikið bara að temja og þjálfa og á sumrin geri ég lítið annað en að halda hryssum undir stóðhesta. Þetta er frekar stór graðhestamiðstöð og hér koma hátt í hundrað hryssur á hverju sumri.,” segir Hildur en öllum hryssunum er annað hvort haldið í hendi eða notast við sæðingar. Á stöðinni eru bæði notaðir stóðhestar í eigu Hildar en einnig eru stóðhestar leigðir á stöðina. Krákur frá Blesastöðum 1A, Tónn frá Auðsholtshjáleigu og Örvar frá Efri-Hrepp eru allir í eigu Hildar og hafa notið góðra vinsæll síðustu árin. Hildur hefur verið að fá 5 – 8 folöld á ári en hún vonast til í framtíðinni að sýna fleiri hross úr eigin ræktun svo hún geti ræktað undan betri hryssum í framtíðinni. “Ég á nokkrar sýndar hryssur sem hafa verið að gefa mér góð reiðhross sem auðvelt er að selja hér á erlenda markaðnum. Ég hef mest, í gegnum árin, selt af þannig hrossum eða þá ungum og efnilegum hrossum. Í ræktun er ég með t.d. Keilisdóttur, hryssu undan Snar frá Kjartansstöðum, Konsert frá Hofi og Lykli frá Blesastöðum en þær hafa allar verið að skila mér góðum hrossum,” segir Hildur.

Í Danmörku er frekar líflegt samfélag í kringum íslenska hestinn “Það er hellingur af íslenskum hestum hér í mínu nærumhverfi og mikið um að vera. Ég hef ekki mikið tekið þátt í félagsmálum sjálf en brenn þó fyrir öll tengt ræktun á íslenska hestinum. Ég hef ekki mikið verið á keppnisbrautinni en sit á hliðarlínunni og dæmi. Ég hef dæmt mikið af gæðingamótum hér erlendis,” segir Hildur sem líkar vel lífið í Danmörku og er ekki á leiðinni heim. “Við komum þó oft í heimsókn til Íslands en við reynum að fara svona 1 – 2 á ári. Við stefnum alla veganna á að koma á Landsmót næsta sumar,” segir Hildur að lokum.