Réttarstemning um helgina

21. september 2011
Fréttir

Framundan er ein stærsta réttahelgi ársins, en skv. Bændasamtökunum mun vera réttað á sex stöðum á föstudag og laugardag. Þar á meðal er hin sívinsæla Laufskálarétt sem laðar að um 3000 gesti árlega. Má því búast við margmenni í Skagafjörðin um helgina.

Auk Laufskálaréttar mun á föstudaginn vera réttað í Deildardalsrétt og Árhólarétt í Unadal. Í Austur-Húnavatnssýslu mun vera réttað í Undirfellsrétt í Vatnsdal á laugardag kl. 10 og síðan í Auðkúlurétt kl. 16. Í Vestur-Húnavatnssýlu verðu réttað í Þverárrétt í Vesturhópi á laugardaginn kl. 13.

Nóg um að vera í Skagafirði

Skagfirðingar hafa augljóslega tekið höndum saman undirbúið helgina vel. Bjóða þeir upp á fjölbreytta dagskrá fyrir þá fjölmörgu sem ætla að skella sér í fjörðinn um helgina. Margir ætla að opna dyrnar sínar fyrir gestum og gangandi, t.d. verður vinnustofa AJ-Leðursaums að Hjaltastöðum með vörur til sýnis og sölu milli kl. 10 og 19 daganna 23.-25. september.

Fimmtudagur 22. september

Stórmyndin Captain America verður sýnd í Króksbíó, Sauðárkróki kl. 20.

Föstudagur 23. september

Stóðréttir verða í Árhólarétt í Unadal og Deldardalsrétt. Tímasetningar eru óljósar.
Skeiðfélagið Kjarval stendur fyrir skeiðkappreiðum á félagssvæði Léttfeta, Fluguskeiði á Sauðárkróki. Mótið hefst kl. 16 en í beinu framhaldi af henni verður sölusýning á sama stað.
Í Reiðhöllinni Svaðastöðum kl. 20.30 munu Skagfirðingar slá upp stórsýningu og ekta skagfirsk gleði í aðdraganda Laufskálaréttar. Á dagskrá verður skeiðkeppni í boði Hótel Varmahlíðar, stórsýning með þar sem glæstir hestar og knapar í fremstu röð koma fram, munsturreið, stóðahestakeppni, upprennandi gæðingar sýna listir sínar, ásamt Íslandsmeisturum og fingrafimum trúbadorum.

Laugardagur 24. september

Stóðréttir verða í Laufskálarétt í Hjaltadal og hefjast kl. 12 eftir að rekið hefur verið úr Kolbeinsdal. Laufskálarétt er allra jafna mest sótta stóðarétt landsins og geta því allir búist við gríðarlegu fjöri.
Laufskálaréttarball verður svo haldið í Reiðhöllinni Svaðastöðum um kvöldið og hefst það kl. 23. Hljómsveitin Von ber ábyrgð á fjörinu á þessum rómaða réttardansleik ásamt Matta Matt, Vigni, Jogvani, Magna og Siggu Beinteins.

Sunnudagur 25. september

Þeir sem hugsa sér til hreyfings á sunnudaginn geta litið við í kaffi og kleinur á Varmalandi í Sæmundarhlíð milli kl. 11-17 því þar opnar fjölskyldan á Varmalandi og Sólveig Stefánsdóttir hesthúsið fyrir gesti til að skoða vel ættuð folöld, trippi og tamin hross sem sem til sölu eru hjá Varmalandi og Miðsitjuhestum ehf. Nánari upplýsingar í s. 895-8182.