RÚV sendir út stærstu mót ársins

RÚV mun senda út beint frá stærstu viðburðum hestamanna í ár og verður fyrsta útsendingin frá Reykjavíkurmeistaramótinu í hestaíþróttum á sunnudaginn kemur, 18. júní nk. Reykjavíkurmeistaramótið er stærsta mót ársins og hefur keppni staðið yfir alla vikuna.
Send verða út úrslit í flokkum ungmenna og meistara þar sem knapar kljást m.a. um sæti í landsliði Íslendinga á HM í Hollandi í sumar. Útsending hefst kl. 13 og stendur til kl. 17 á aðalrás RÚV.

Þá mun RÚV einnig senda út frá lokadegi Íslandsmótsins í hestaíþróttum á Selfossi 2. júlí nk. og vera með fréttir og samantektarþætti frá Heimsmeistaramótinu í Hollandi í ágúst.
Um stjórn útsendinga sér Óskar Þór Nikulásson, en umsjón hefur Hulda G. Geirsdóttir, auk álitsgjafa og aðstoðarfólks sem koma munu að verkefninu.