Takmörk á þyngd geta haft stór áhrif á hestamennsku hérlendis

The Social License to operate eða leyfi samfélagsins til að starfa er hugtak sem er vaxa hratt erlendis og hefur verið mikið í umræðunni. Þar er átt við óbeinan samning á milli almennings og atvinnugreinar sem hagnýtir dýr til skemmtunar eða atvinnusköpunar. Ef almenningur sættir sig ekki við starfsemina eins og hún er orðin geti stjórnvöld að gripið inn í til þess að vernda velferð dýranna.

FEIF hefur áhyggjur af þessari umræðu og í viðtali Eiðfaxa við Jean-Paul Balz, sem er í framboði til Forseta FEIF, segir hann þetta vera eina af stærri áskorunum FEIF.

Gundula Sharman, æskulýðsleiðtogi FEIF og er með forystu í þessu málefni fyrir FEIF var í viðtali í Morgunblaðinu í morgun. Þar segir hún umræðuna ekki vera mikið meðal hestafólks heldur aðallega þeirra sem setja reglurnar og fylgja þeim eftir, svo sem dýralækna. Hún segir þrýsting utan frá fara vaxandi og tekur sem dæmi að frönsk stjórnvöld séu farin að ræða hvers konar búnað megi nota á Ólympíuleikunum sem eiga fara fram í París 2024 og jafnframt að spurning hafi komið upp um hvort banna eigi hestaíþróttir á leikunum. Samkvæmt Gundulu hafa skipuleggjendur HM í Hollandi á næsta ári vissar áhyggjur af því að verða fyrir gagnrýni sjáist þar þungir karlmenn ríða á litlum hrossum.

Samkvæmt Gundulu Sharman beinist umræðan ekki að íslenska hestinum beint en vegna stærðar hans gæti þessi umræða haft áhrif á notkun hans. Umræðan beinist nú að því að hámarksþyngd knapa skuli ekki vera yfir 20% af þyngd hestsins og fari svo að sett verði takmörk verður hestafólk sem er yfir 70-80 kg. útilokað frá notkun á íslenskra hrossa.

Eins og okkur hestamönnum er kunnugt mætti segja að hestaheiminum sé tvískipt; keppnishlutinn og síðan hinn almenni reiðmaður. Gundula segir að almennt fari meira fyrir keppnishlutanum og þegar ljótar myndir birtast og frásagnir þá veki það upp heitar tilfinningar. Nefnir hún einnig blóðmerarhaldið í þessu samhengi og segir að það snúi að sömu spurningunni; hvort eigi að nýta dýrin til að skapa ágóða fyrir mennina. Það er mikil umræða í Evrópu um blóðmerahald og segur hún hestafólk í Evrópu fylgjast vel með þeim málum. „Eitt óásættanlegt tilvik getur haft áhrif á greinina í heild sinni,“segir hún í viðtalinu.

Aðspurð hvað FEIF sé að gera til að bregðast við segir hún mikilvægt að taka frumkvæðið og upplýsa heiminn um hvað sé verið að gera og uppfæra reglur á grundvelli vísindalegra rannsókna. Hún nefnir að Horse of Iceland séu að vinna gott verk í að byggja upp góða ímynd og öll slík vinna sé mikilvæg.

Í lok viðstalsins segist Gundula „skilja efasemdir Íslendinga vegna þessarar umræðu í Evrópu. Á Íslandi hafi fólk almennt betri tengingu við náttúruna en hestafólk á meginlandinu sem aðeins ríði sér út til ánægju. En til þess að hægt verði að ríða út eftir tíu ár, með sama hætti og í dag, þurfi Íslendingar eins og aðrir að fylgjast með umræðunni,“

Hægt er að lesa viðtalið við Gundula í heild sinni í Morgunblaðinu sem kom út í morgun.