Guttormur og Kamma efst á Hellu

Þá er vorsýningum lokið á Rangárbökkum. Yfirliti er ný lokið en á sýningunni voru sýnd 91 hross og hlutu 82 fullnaðardóm. Dómarar á sýningunni voru þau Jón Vilmundarson, Steinunn Anna Halldórsdóttir og Sveinn Ragnarsson.

Efst á sýningunni eru þau Guttormur frá Dallandi og Kamma frá Margrétarhofi, bæði sjö vetra, undan Spuna frá Vesturkoti og með 8,61 í aðaleinkunn.

Guttormur hlaut fyrir sköpulag 8,44 og fyrir hæfileika 8,69. Hann er undan heiðursverðlaunahryssunni Grósku frá Dallandi og er ræktaður af þeim Þórdísi Sigurðardóttir og Gunnari Dungal. Eigandi er Hestamiðstöðinn Dalur ehf. og það var Axel Örn Ásbergsson sem sýndi hestinn.

Kamma hlaut fyrir sköpulag 8,31 og fyrir hæfileika 8,76. Hún er undan Hörpu frá Gunnarsstöðum og eigandi og ræktandi er Margrétarhof ehf. Aðalheiður Anna Guðjónsdóttir sýndi Kömmu.

Ein tía var gefin á sýningunni en hann Herakles frá Þjóðólfshaga 1 hlaut 10 fyrir skeið, sýndur af ræktanda og eiganda sínum Sigurði Sigurðarsyni.

Nokkur hross hlutu úrvals einkunn fyrir ákveðin eiginleika í hæfileikadómi. Hinrik frá Hásæti hlaut 9,5 fyrir tölt og stökk. Tindur frá Laugabökkum og Guttormur frá Dallandi hlaut 9,5 fyrir skeið. Kamma frá Margrétarhof og Fjöður frá Finnastöðum hlutu báðar 9,5 fyrir samstarfsvilja. Flauta frá Árbakka fékk 9,5 fyrir tölt og hægt tölt og Spá frá Margrétarhofi hlaut 9,5 fyrir tölt. Flestar 9,5urnar fékk Kór frá Skálakoti eða fyrir tölt, brokk og samstarfsvilja.