Líflegt starf hjá Hestamannafélaginu Geysi

Hestamannafélagið Geysir hefur farið kröftuglega af stað inn í nýja árið með fjölbreyttu starfi sem spannar allt frá reiðmennsku og fræðslu til skemmtunar og öflugs æskulýðsstarfs. Dagskráin hefur verið þétt síðustu vikur og ljóst að metnaður er lagður í að bjóða upp á eitthvað fyrir alla félagsmenn, jafnt atvinnufólk sem nýliða.

Fjölbreytt námskeiðshald

Árið hófst með sirkusnámskeiði dagana 10.-11. janúar í Rangárhöllinni. Þar kenndi Ragnheiður Þorvaldsdóttir nemendum fjölbreyttari aðferðir við að nálgast hestamennskuna.

Í kjölfarið fylgdu regluleg reiðnámskeið:

Almennt reiðnámskeið barna: Hófst 14. janúar undir handleiðslu Eyglóar Örnu Guðnadóttur og Selinu Bauer.

Keppnisnámskeið: Hófst 15. janúar með 25 metnaðarfullum nemendum. Þar af eru 19 í barnaflokki og 6 í unglingaflokki, en kennarar eru þau Carolin Böse og Gústaf Ásgeir Hinriksson.

Pollar og kríli: Fram undan eru svo námskeið fyrir yngstu iðkendurna sem hefjast á laugardögum í febrúar

Eygló Arna Guðnadóttir segir börnum til á reiðnámskeiði

37 börn í æskulýðsferð

Æskulýðsstarfið blómstrar en þann 16. janúar var farin fjölmenn æskulýðsferð með 37 börn. Boðið var upp á ferðina endurgjaldslaust fyrir börn í félaginu og sáu sjálfboðaliðar um fylgd svo foreldrar gátu setið heima.

Hópurinn heimsótti hrossaræktarbúið Sunnuhvol, þar sem Glódís og Védís tóku á móti þeim, og héldu svo á Ingólfshvol til móts við Teit Árnason og Eyrúnu Ýr. Ferðinni lauk svo með sameiginlegri máltíð áður en haldið var aftur í Rangárþing.

Fræðsla og skemmtun

Félagið leggur einnig ríka áherslu á fræðslu. Þann 19. janúar hélt Einar Ásgeirsson, fóðurfræðingur hjá Fóðurblöndunni, fræðslukvöld þar sem farið var yfir næringarþarfir íþróttahestsins og fóðrun á húsi.

Þá hefur skemmtinefndin blásið til Meistaradeildarkvölda líkt og í fyrra. Fyrsta kvöldið var haldið á Gallery Pizza á Landvegamótum þar sem félagar komu saman, borðuðu og horfðu á beina útsendingu frá Meistaradeildinni á Eiðfaxa TV.

Það er óhætt að segja að framtíðin sé björt í Rangárþingi ef marka má þessa góðu byrjun á árinu hjá Geysi.

Fylgst með Meistaradeild Líflands á EiðfaxaTV