Glódís og Vikar sigurvegarar í tölti

27. mars 2026
Fréttir

Gífurleg spenna áfram í einstaklings- og liðakeppni.

Þau voru mögnuð tilþrifin í töltkeppni Meistaradeildar Líflands á lokakvöldi deildarinnar sem nú er í gangi. Framundan er svo keppni í flugskeiði sem mun skera úr um hverjir standa uppi sem heildarsigurvegarar í einstaklings- og liðakeppni. Allt í þráðbeinni á EiðfaxaTV.

Glódís og Vikar sigra töltið

Að lokinni forkeppni var það Glódís Rún Sigurðardóttir sem efst stóð á Vikari frá Austurási með 8,57, í öðru sæti var Jakob Svavar á Skarpi frá Kýrholti með 8,43 í þriðja sætinu var svo Jón Ársæll á Spörtu frá Eystra-Fróðholti með 8,33 en það er mögnuð einkunn í fyrstu töltkeppni. Þá var það stjörnuparið Flosi Ólafsson og Brynja Kristinsdóttir á systkinunum Sunnu og Röðli frá Haukagili í Hvítársíðu, Brynja með 7,97 í einkunn og Flosi með 7,93.

A-úrslitin voru algjört augnakonfekt og þar fór saman frábærir knapar á glæsilegum hrossum. Glódís Rún hélt efsta sætinu á Vikari og hluat í einkunn 9,00, Jakob Svavar og Skarpur urðu í 2.sæti með 8,83 og í því þriðja Flosi Ólafsson og Röðull með 8,50.

A úrslit
Sæti	Knapi	Hross	Einkunn
1	Glódís Rún Sigurðardóttir	Vikar frá Austurási	9,00
2	Jakob Svavar Sigurðsson	Skarpur frá Kýrholti	8,83
3	Flosi Ólafsson	Röðull frá Haukagili Hvítársíðu	8,50
4	Jón Ársæll Bergmann	Sparta frá Eystra-Fróðholti	8,33
5	Brynja Kristinsdóttir	Sunna frá Haukagili Hvítársíðu	8,06

Til B-úrslita kepptu þau Ásmundur Ernir Snorrason á Hlökk frá Strandarhöfði, Aðalheiður Anna Guðjónsdóttir á Flóvent frá Breiðstöðum, Þorgeir Ólafsson á Aspari frá Hjarðartúni, Helga Una Björnsdóttir á Hrefnu frá Fákshólum og Árni Björn Pálsson á Krika frá Krika. Þau Ásmundur, Aðalheiður og Árni Björn voru þrír efstu knaparnir í einstaklingskeppni fyrir kvöldið og náðu sér í mikilvæg stig í þeirri keppni með því að komast í úrslit.

Það fór svo að Ásmundur Ernir og Hlökk stóðu efst í B-úrslitum með 8,78 í einkunn

B úrslit
Sæti	Knapi	Hross	Einkunn
6	Ásmundur Ernir Snorrason	Hlökk frá Strandarhöfði	8,78
7	Þorgeir Ólafsson	Aspar frá Hjarðartúni	8,50
8	Helga Una Björnsdóttir	Hrefna frá Fákshólum	8,17
9	Aðalheiður Anna Guðjónsdóttir	Flóvent frá Breiðstöðum	7,67
10	Árni Björn Pálsson	Kriki frá Krika	7,50

Lið Hrímnir/Hest.is var stigahæsta liðið í töltkeppni og náði í mikilvæg stig!

Ásmundur í forystu fyrir skeiðið

Ásmundur heldur þar með forystu í einstaklingskeppninni fyrir flugskeiðið með 43,5 stig. Jöfn í 2.-3 sæti eru þau Aðalheiur Anna og Jakob Svavar með 39 stig í fjórða sæti er Árni Björn Pálsson með 36 stig og í því fimmta Jón Ársæll Bergmann með 33 stig.