Titill hæst dæmdur á Mið-Fossum

Kynbótasýningu á Mið-Fossum lauk í gær með yfirlitssýningu. Alls voru það 22 hross sem mættu til sýningarinnar og hlutu 17 þeirra fullnaðardóm og 5 einungis sköpulagsdóm. Dómarar voru þeir Friðrik Már Sigurðsson og Jens Füchtenschnieder.

Sýning var í beinni útsendingu á EiðfaxaTV og er einnig aðgengileg þar nú.

Titill frá Skrúð hæst dæmdur

Hæst dæmda hross sýningarinnar var fjögurra vetra gamall stóðhestur, Titill frá Skrúð. Ræktandi hans er Sigfús Kristinn Jónsson en eigandi er Björn Haukur Einarsson sem einnig sýndi hestinn. Faðir Titils er Sólfaxi frá Herríðarhóli og móðir er Pera frá Skrúð. Fyrir sköpulag hlaut hann 8,31, fyrir hæfileika 8,36 þar af 9,0 fyrir greitt stökk og samstarfsvilja.