Dagný hæst dæmd í Herning

Um helgina fór fram kynbótasýning í Herning í Danmörku, dómarar voru þau Tom Buijtelaar, Elsa Mandal Hreggviðsdóttir og Marlise Grimm. Alls voru það 46 hross sem til sýningar mættu og af þeim voru 35 sýnd í fullnaðardómi.

Hæst dæmda hross sýningarinnar var Dagný frá Lækjamóti sem er sjö vetra gömul undan Ölni frá Akranesi og Hafdísi frá Lækjamóti, ræktandi og eigandi er Mona Olsson. Dagný hlaut 8,43 fyrir sköpulag þar á meðal 9,0 fyrir samræmi. Fyrir hæfileika hlaut hún einnig 8,43 þar á meðal 9,0 fyrir bæði samstarfsvilja og fegurð í reið. Sýnandi hennar var Caspar Logan Hegardt en hann sýndi flest hross á sýningunni alls sjö talsins.

Líf hlaut afkvæmaverðlaun

Á sýningunni var hryssan Líf frá Slippen heiðruð og hlaut afkvæmaverðlaun í úrvalsflokki (eliteklasse) með 8,10 í meðaleinkunn afkvæma. Ræktandi og eigandi Lífar er Jóhann Rúnar Skúlason. Líf er undan Garra frá Reykjavík og Andrá frá Skarði. Í afkvæmahópi hennar er meðal annars hinn þekkti stóðhestur og keppnishestur Evert frá Slippen, en hann hefur sjálfur hlotið 1. verðlaun fyrir afkvæmi, er hátt dæmdur í kynbótadómi og unnið marga glæsta sigra á keppnisvellinum. Hann var valinn stóðhestur ársins í Danmörku árin 2021, 2024 og 2025.

Dómsorð Lífar frá Slippen hljóma á þessa leið í íslenskri þýðingu:

„Afkvæmi Lífar frá Slippen eru með beina neflínu, vel reistan háls og gott samræmi. Liðir fóta eru meðal stórir og sinar mættu vera öflugri. Hófarnir eru efnismiklir. Afkvæmin er mjúk og rúm á tölti með háum fótaburði. Stökkið er ferðamikið og skrefmikið. Þau eru viljug, samstarfsfús og vel reist undir knapa.“

Hross dæmd í Herning raðað eftir aðaleinkunn