Dagur með hestatannlækni

Jana Zedelius er dýralæknir með sérhæfingu í hestatannlækningum og rekur hún fyrirtækið Hestatannheilsa. Ásta Björk Friðjónsdóttir fylgir henni á eftir í nýjasta þætti sínum sem fer í loftið á EiðfaxaTV í kvöld klukkan 20:00.

„Hugmyndin að þættinum hófst með því að við hestafólkið í Stykkisólmi söfnuðum saman í hóp til að fá hana í Hólminn. Eftir að hafa fylgst með henni vinna í hestinum mínum og hlustað á útskýringarnar hennar varð ég bara „mind blown“ eins og maður segir á fallegri íslensku. Ég hugsaði strax hvað mig langaði til þess að hún myndi líta upp í alla hestana mína og náði að troða einum í viðbót að. Þá hófst meira spjall og ég spurði hana hvort hún hefði áhuga á að lofa mér að fylgja sér í einn dag og búa til þátt um það fyrir áskrifendur Eiðfaxa TV og hún var til!“ Segir Ásta um tilurð þáttarins.

Ásta lofar áhugaverðum þætti og fróðleiksríkum þætti og hvetur alla til áhorfs. „Við fórum á hestaleiguna á Stóra-Kambi þar sem hún fer árlega í nokkra daga í senn að athuga með hestana þeirra. Það er svo gaman að hlusta á hana segja frá og útskýra og hún er svo fróð! Hún er svo djúpt sokkin á bólakaf í þessi fræði og það voru bara hrein forréttindi að fá þennan masterclass þennan dag. Ég vona að sem flestir horfi og kynni sér störf Jönu!“

Stiklu úr þættinum má sjá hér að neðan.