Landsmótið í brennidepli

Eins fyrri ár má búast við að Landsmót verði í brennidepli á Landsþingi LH, sem haldið verður í lok vikunnar. Fyrir þinginu liggja amk. átta þingskjöl er varða Landsmótið á einn eða annan hátt.

Stjórn LH vill endurskoða rekstrarform Landsmóts hestamanna ehf. í samstarfi við Bændasamtökin í ljósi rekstrarörðugleika eignahlutafélgsins sem og þeirra sem reka landsmótssvæðin. „Einnig þarf að endurskoða tilgang og markmið landsmótanna og ræða hvort þau eru nýtt rétt til að útbreiða hestaíþróttinna,“ segir í greinargerð stjórnarinnar.

Keppnisnefnd LH leggur til að á Landsmótum megi skipta um knapa á skeiðhestum eins og tíðkaðist í kappreiðum áður en FIPO reglurnar voru teknar upp á Íslandi.

Hestamannafélagið Fákur vill að ákvarðanir um landsmótsstaði verði teknar amk. fimm árum áður en landsmót verða haldin, eins og kveðið er á um í lögum LH. „Mikilvægt er fyrir þá staði sem bjóða fram svæðin sín til landsmótshalds hafi nægan tíma til undirbúnings, fjármögnunar og framkvæmda á sínu svæði.“ 

Hestamannafélagið Glaður vill rýmka reglur varðandi val hrossa og keppenda á Landsmót. „Mörg keppnishross eru í þjálfun víðs fjarri heimahögum og fjarri úrtökumóti sem haldið er af félagi eigandans. Í sumum tilfellum getur því verið erfitt um vik að flytja hrossin langar leiðir til að taka þátt í úrtökumóti á sama tíma og knapinn þarf að sýna önnur hross á kynbótasýningu allt annarstaðar.“ Félagið leggur því til að ekki sé skylt að hross sem stefnt er með í gæðingakeppnina á Landsmóti séu sýnd á úrtökumóti viðkomandi félags heldur komi einnig til greina að þau taki þátt í gæðingakeppni annars staðar, hvort sem um úrtökumót er að ræða eða ekki. „Hér er ekki verið að leggja til breytingu á því fyrirkomulagi að hvert félag eigi rétt á að senda á Landsmót ákveðinn fjölda hrossa eftir stærð félagsins. Ekki er heldur ætlast til að félög komi sér hjá því að halda úrtökumót enda gæti það bitnað á öðrum keppendum. Þessi tillaga snýst í raun um að auðvelda það ferli að finna bestu hrossin innan hvers félags til að fara í gæðingakeppnina á Landsmóti,“ segir í greinagerð frá hestamannafélaginu.

Einkunnaröð ræður rétti til þáttöku í gæðingakeppni

Róttækustu tillögurnar koma frá Hestamannafélaginu Geysi, en félagið leggur til að lögum um val hrossa og keppenda á Landsmót verði breytt. 

Félagið vill að í stað úrtökumóta hjá hverju hestamannafélagi fari fram sex úrtökumót víðsvegar um land fyrir börn, unglinga og ungmenni. Til að gæta samræmis vill félagið að fimm dómarapör (10 dómarar) og einn eftirlitsdómari dæmi allar úrtökunar. „Mun þetta auðvelda mótshöldurum að halda kostnaði niðri. Úrtökumót skal vera ein umferð en öllum heimilt að fara á öll þau úrtökumót sem í gangi eru og  þannig fá fleiri tækifæri til að keppa með sinn hest. Einnig hjálpar þetta þeim einstaklingum sem eru að vinna langt frá sínu heimafélagi og þurfa því eingöngu að fara á það úrtökumót sem næst er. Að auki er þetta til hagræðis fyrir þá knapa sem eru með hesta fyrir fleiri en eitt félag. Einnig getur þetta fyrirkomulag komið í veg fyrir árekstra milli úrtökumóta og yfirlitssýninga kynbótahrossa. Þess þá heldur fáum við dómara í betri æfingu og meira samræmi á dómgæslu,“ segir í greinagerð sem fylgir tillögunni.

Ennfremur leggur félagið til lagabreytingar er varða val á keppendum í A og B-flokki gæðinga. „Í  A-flokki og B-flokki gæðinga á Landsmótum skal vera 1 keppandi frá hverju aðildarfélagi LH þ.e. efsta einkunn í hverjum flokki frá hverju aðildarfélagi. Heildarfjöldi keppenda í hverjum flokki skal ákvarðast af stjórn LH og mun einkunnarröð ráða hverjir komast inn.“ Með breytingunum má auka gæði hross á Landsmóti að mati félagsins, „því alltaf eru einhver hross sem sitja heima sem eiga góða möguleika með að ná góðum árangri á Landsmóti.“