Yfirlýsing frá Limsfélaginu

Fjallað var um stjórn Limsfélagsins í Skýrslunni um hrunið og hún harðlega gagnrýnd fyrir að hafa ekki nægilegt gegnsæi með Liminn og vera með hann í felum upp í sveit þar sem hluthafar hafa ekki getað borið hann augum.

Einnig var stjórnin harðlega gagnrýnd fyrir að veita kúlulán fyrir nokkrar hryssur á síðasta ári er þær fengu að leika sér í haganum með Lim og kúlunum hans óáreitt.

Á grundvelli þessarar gagnrýni var sú ákvörðun tekin af skikkunarnefnd, sem var sett yfir stjórn Limsfélagsins, að hafa meira gegnsæi í rekstrinum og gefa hluthöfum kost á að sjá gripinn á Stórsýningunni Fáks á laugardagskvöldið. Þar er fastlega búist við að Limurinn slái í gegn og aðsóknin verði mikil í hann í sumar.

Búið er að finna girðingu fyrir hann í sumar og er hún í Hornvík á Ströndum. Hryssueigendur eru bara beðnir að kaupa aukatryggingu fyrir ísbjarnarárásum á hryssurnar sínar eða redda girðingu nær menningunni fyrir skærustu vonarstjörnu íslenskrar hrossaræktar. Ef svo ólíklega vill til að Limurinn slær ekki í gegn eru hluthafar beðnir að fara á heimasíðu Limsins og læra þessar 10 afsakanir sem gott er að hafa á reiðum höndum til að sletta fram ef einhverjum dirfist að halda því fram að hann sé nú bara rétt sæmilegur.

www.123.is/limur