Íslandsmót í hestaíþróttum á Selfossi

Íslandsmót í hestaíþróttum 2011 verður verður haldið á Brávöllum á Selfossi dagana 13.-16. júlí nk. 

„Undirbúningur fyrir mótið hefur staðið frá því sl. vetur og hafa töluverðar framkvæmdir verið á Brávöllum nú í vor og sumar.  Sveitarfélagið Árborg kemur myndarlega að mótinu en félagið fékk 7 milljónir króna  til framkvæmda á svæðinu.   Svæði Brávalla hefur verið byggt upp í samstarfi hestamannafélagsins og sveitarfélagsins.  Frá síðasta Íslandsmóti hefur verið byggð reiðhöll á svæðinu sem gerir aðstöðu félagsins enn betri en áður.  

Tilkoma reiðhallarinnar hefur verið mikil lyftistöng í starfi félagins.  Frá því að hún var tekin í notkun hafa verið nær daglega námskeið og annað fræðlsustarf í gangi í húsinu fyrir bæði unga sem aldna.  

Skráning á mótið fer fram hjá aðildarfélagi hvers keppanda.  Aðildarfélagið skráir síðan sína keppendur  á mótið í gegnum sportfengur.is skráningargjaldið er kr. 5.000- fyrir hverja grein og greiðist við skráningu.   Síðast skráningardagur er 7. Júlí nk.

Verið velkomin til okkar Sleipnismanna á Brávelli, við hlökkum til að sjá ykkur sem flest,“ segir í fréttatilkynningu frá fjölmiðlafulltrúa Íslandsmótsins í ár, Margréti K. Erlingsdóttur.