„Fengum bætur til að kaupa hey“

Flúormengun er enn talsverð í Reyðarfirði og hefur þetta haft áhrif á búskap þar. Hestamenn á svæðinu hafa haft áhyggjur af stöðunni en í skýrslu frá Umhverfisstofnun kemur fram að beitarlönd séu illa hæf til beitar fyrir nautgripi og sauðfé, en hæft til hrossabeitar.

Í viðtali við Eiðfaxa segir Jóhann Sædal hestamenn hafa fengið bætur frá Álverinu í fyrra. Þær bætur voru ætlaðar til heykaupa, en ekki var mælt með að fóðra hross á því heyi sem fékkst af túnum í firðinum í fyrra.

Fyrr á árinu kom fram á vef Matvælastofnunar fram að samkvæmt reglugerð um óæskileg efni í fóðri eru hámarksgildi flúors í fóðri 50 mg/kg fyrir nautgripi, geit- og sauðfé en 30 mg/kg ef dýrin eru mjólkandi.

Flúor hleðst upp í gróðri og of mikið af því getur skemmt tennur í bæði kindum og hestum. Ekkert er í starfsleyfi sem segir til um hve mikið flúor má vera í gróðri eða grasbítum. Hins vegar er fylgst vel með þessu í nágrenni álvera og gripið inn í ef tilefni er til. Flúor er mælt í rjáfri álversins í Reyðarfirði, í skorstein, loftsýni eru tekin á fjórum stöðum utan þynningarsvæðis og í gróðri á svæðinu. Umhverfisstofnun telur flúorið í Reyðarfirði ekki valda fólki hættu en full ástæða sé til að bregðast við og kanna hvort áhrifa gæti í búfé í firðinum. Áður en ráðist verði í frekari aðgerðir þurfi að kanna styrk flúors í heyi. Umhverfisstofnun hefur þegar beðið Alcoa Fjarðaál að kanna hvað veldur þessari mengun og er sú rannsókn hafin. Þá hefur Alcoa Fjarðaál beðið Náttúrustofu Austurlands um ráðgjöf varðandi frekari rannsóknir.