Ævintýrið á enda
Kynbótajöfurinn mikli Orri fra Þúfu var felldur nú um helgina 28 vetra gamall.
Eins og kunnugt er af fréttum hlaut hann meiðsli á hálsi í mars á þessu ári, þar sem eitthvert misgengi varð á beinum í hálsi og háði það honum nokkuð í hreyfingum. Ekki er kunnugt með hvaða hætti þetta gerðist enn í framhaldinu ákveðið að halda ekki hryssum undir klárinn í sumar. Nýlega var svo gerð úttekt á stöðu mála og þar sem engin breyting var sjáanlega var ákveðið að fella klárinn.
Stjórnarmenn í Orrafélaginu voru einhuga um að hér færi best á að enda ævintýrið mikla sem ævi Orra hefur verið. Klárinn búinn að skila ómetanlegu framlagi til eigenda sinna og hrossaræktarinnar í heild sinni. Segja má að sama hvar sé borið niður í afrek hans, ferill hans hafi verið með þvílíkum eindæmum að seint verði þar um jafnað eða bætt. Það síðasta í hans afrekum er náttúrulega hans frábæra ending en 27 vetra gamall, það er í fyrra, skilaði hann 25 fylfullum hryssum inn í veturinn og eru þessi folöld væntanlega öll fædd. Þau síðustu tvö fæddust fyrir rétt tæpum tveimur vikum síðan. Þar skilaði Orri 50 % fyljun sem jafnframt er hans lakasta fyljunarár en eigi að síður frábær árangur hjá hesti á þessum aldri.
Orri var heygður í fæðingarstað sínum Þúfu, þar sem segja má að hann hafi alla tíð átt lögheimili og var þar alla tíð, fyrir utan fyrstu fimm ár ævi sinnar sem var á stóðhestastöð ríkisins í Gunnarsholti, auk þess að bregða sér af bæ þegar hann var á sæðingarstöðinni á sama stað, nokkrar vikur á ári um nokkurra ára skeið.
