Sætir pungar og gellur á þorrablóti

Já það verða súrir pungar, súrmatur, hangikjöt, saltkjöt, harðfiskur, svið og allur almennur og góður þorramatur á boðstólum á Þorrablóti Fáks að ógleymdum sætum pungum og gellum sem mæta á svæðið. Einnig verður boðið upp á lambalæri fyrir þá sem eru súrir yfir þorramatnum að ógleymdum guðaveigum í fljótandi formi.

Eftir góðan útreiðartúr á laugardaginn er tilvalið að skella sér á Þorrahlaðborðið hjá Fáki sem verður í félagsheimili Fáks þann 17. janúar. Húsið opnar kl. 17:00 og stendur veislan fram eftir kvöldi. Harmonikkuleikur, matur, söngur og gleði – hvað er hægt að hugsa sér það betra.

Aðgangseyrir á Þorrahlaðborðið er aðeins kr. 3.500 fyrir fullorðna, 1.500 fyrir 7 – 14 ára og frítt fyrir 6 ára og yngri.
Allir velkomnir á Þorrablót hjá Fáki.
 
Þorranefndin