Ætlar þú í Háskólanám á Hólum?

Háskólinn á Hólum hefur fest sig í sessi sem miðstöð reiðkennslu og reiðmennsku á íslenska hestinum. Fjöldi reiðkennara og knapa hafa útskrifast frá skólanum á síðustu áratugum og flest þeirra standa í fremstu röð á hinum ýmsu sviðum í faginu. Hér fyrir ofan má horfa á kynningarmyndband á námi við Hestafræðideild.

Eins og segir á vef Hólaskóla:

Markmið Hestafræðideildar er að veita fagmenntun á sviði reiðmennsku, reiðkennslu, tamninga, og hestahalds og að vinna að þróun og nýsköpun þekkingar, á öllum sviðum er varða hestinn, með rannsóknum. Með þessum hætti verði stuðlað að aukinni arðsemi í atvinnugreininni, útbreiðslu hestamennskunnar og velferð hestanna. Deildin er opinber miðstöð menntunar og rannsókna á sviði hestamennsku, tamninga, reiðmennsku og reiðkennslu á Íslandi. Deildin þjónar Íslandshestamennskunni um allan heim og nemendahópurinn er alþjóðlegur.

Námið í Hestafræðideild er fjölbreytt að viðfangi og aðferðum þar sem bókleg og verkleg kennsla er samþætt, kennslan byggist á fyrirlestrum og lestri fagefnis. Í náminu er lögð mikil áhersla á verklega þjálfun í formi einkakennslu, hópkennslu og sýnikennslu. Samhliða námsleiðinni BS í reiðmennsku og reiðkennslu er boðið upp á þá möguleika að útskrifast með diplómu að loknu einu námsári (leiðbeinendapróf) eða tveimur (tamningapróf). Jafnframt er boðið uppá meistaranám í hestafræðum við deildina þar sem áherslan er á rannsóknarnám með sterkan fræðilegan bakgrunn. 

Umsókn um nám lýkur 5.júní en sækja má um með því að smella hér.