Nökkvi með hæstan dóm fyrir yfirlit

Forsýningu í flokki 5, 6 og 7 vetra gamalla stóðhesta og eldri er nú lokið en yfirlit kynbótahrossa fer fram á morgun.

Skyggnir frá Skipaskaga er með hæsta aðaleinkunn fimm vetra gamalla stóðhesta. Hann er með 8,66 fyrir sköpulag, 8,00 fyrir hæfileika og 8,23 í aðaleinkunn. Sýnandi hans er Daníel Jónsson, ræktendur og eigendur eru Jón Árnason og Sigurveig Stefánsdóttir. Faðir Skyggnis er Skýr frá Skálkoti en móðir Skynjun frá Skipaskaga.

Í flokki sex vetra stóðhesta er Kunningi frá Hofi efstur með 8,35 fyrir sköpulag, 8,38 fyrir hæfileika og í aðaleinkunn 8,37. Sýnandi er Viðar Ingólfsson en eigendur og ræktendur eru Jón Gíslason og Eline Manon Schrijver. Faðir Kunningja er Spuni frá Vesturkoti og móðir Kantata frá Hofi.

Í elsta flokki stóðhesta er það Nökkvi frá Hrísakoti sem er með hæstan dóm og er hann einnig hæst dæmda hross sýningarinnar fyrir yfirlit. Hann hlaut fyrir sköpulag 8,39, fyrir hæfileika 8,52 og í aðaleinkunn 8,47. Faðir Nökkva er Rammi frá Búlandi og móðir Hugrún frá Strönd II. Ræktandi og eigandi er Sif Matthíasdóttir. Jakob Svavar Sigurðsson sýndi Nökkva.