Frábær tilþrif á þýska meistaramótinu

Þýska meistaramótinu lauk í gær með A-úrslitum í hringvallargreinum og keppni í 100 metra skeiði. Keppni var æsispennandi og óvænt úrslit litu dagsins ljós. Íslendingar mættu læra margt af framkvæmd verðlaunaafhendinga frá þessu móti. Glæsilegur verðlaunapallur var á miðju vallarins þar sem þrír efstu knapar stigu upp á og voru verðlaunaðir með mikilli viðhöfn, þýski þjóðsöngurinn spilaður og allt hið hátíðlegasta.

Þá ber að hrósa góðri útsendingu frá mótinu og var fróðlegt að fylgjast með og sjá hestakostinn þar ytra sem var breytilegur.

Að mati greinarhöfundar lágu dómarar fremur hátt og einkunnir eftir því, útskýrist það helst af því að þeir knapar sem náðu ekki að sýna sitt besta fengu of hátt og þurfti því, sem eðlilegt er, að gefa þeim sem greinilega voru með meiri reiðfærni og betur ríðandi hærri einkunn. Bestu knapar og hestar á þessu móti eru þó á heimsmælikvarða og verða illviðráðanlegir á næsta heimsmeistaramóti. Dómarar þurfa að vera ófeimnari við að nota teygni við dómstörf, bæði upp og niður og á þetta ekki aðeins við þýska meistaramótið heldur dómgæslu almennt.

Í fréttinni verður farið yfir helstu úrslit frá mótinu. En ljósmyndir sem fylgja tóku velunnarar og vinir Eiðfaxa þau Henk Peterse og Patty van der Kaiij og eru þær birtar með góðfúslegu leyfi þeirra.

Lilja Thordarson varð þýskur meistari í fjórgangi á Hjúpi frá Herríðarhóli með einkunnina 7,63. Lilja var fimmta eftir forkeppnina en stóð uppi sem sigurvegari. Til gamans má geta þess að Hjúpur er undan Stormi frá Herríðarhóli og Hyllingu frá Herríðarhóli og er því m.a. sammæðra Sólfaxa frá Herríðarhóli

Lilja og Hjúpur urðu nokkuð óvænt þýskir meistarar í fjórgangi

Frauke Schenzel vann fimmgang með yfirburðum á Óðni vom Habichtswald með frábæra einkunn 8,07. Óðinn er fagurlega skapaður gæðingur sem hlotið hefur 8,42 fyrir sköpulag í kynbótadómi, fyrir hæfileika 9,02 og í aðaleinkunn 8,79. Hann er undan Fannari frá Kvistum og Óskadís vom Habichtswald. Frauke varð einnig meistari í samanlögðum fimmgangsgreinum á Óðni.

Frauke Schenzel og Óðinn vom Habichtswald

Í 100 metra skeiði fóru 14 hestar á undir 8 sekúndum og þó nokkuð margir vel rúmlega það.

Markus Albrecht-Schoch og Kóngur frá Lækjamóti náðu bestum tíma er þeir fóru á 7,13 sem er besti tími ársins í þessari grein. Kóngur er 19 vetra undan Kolfinni frá Kjarnholtum og Höffu frá Samtúni. Elvar Einarsson keppti lengi vel á Kóngi með góðum árangri.

Jolly Schrenk og Glæsir von Gut Wertheim urðu þýskir meistarar í slaktaumatölti með 8,79 í einkunn. Glæsir er þýsk ættaður hestur en í ættartréi hann er þó að finna gamla íslenska stofna og er hann tvöfalt út af Herði frá Kolkuósi blandað við Kirkjubæjar og Sauðárkrókshross í gegnum Sörla og Þátt. Jolly varð einnig samanlagður meistari í fjórgangsgreinum.

Irene Reber og Þokki frá Efstu-Grund unnu síðustu úrslitin sem fram fóru í gær en þau voru í tölti T1. Heildareinkunn þeirra var 8,0. Þokka kannast flestir við eftir glæstan sigur Kristínar Lárusdóttir á honum í þessari grein á HM2015. Þokki er undan Andvara frá Ey 1 og Kötlu frá Ytri-Skógum. Sammæðra Þokka er hestadjásnið Askja frá Efstu-Grund.