Tvöföld jólaútgáfa Eiðfaxa

13. desember 2012
Fréttir

Tvöföld jólaútgáfa Eiðfaxa er nú í prentun og berst áskrifendum í næstu viku. Blaðið er stútfullt af fræðandi og skemmtilegu efni sem aldrei fyrr.

Vilji og geðslag eru í brennidepli en að dæma eiginleikanna getur verið vandkvæðum háð. Fræðingar og fagmenn tjá sig um mat á eiginleikanum.

„Við hestamenn verðum að passa okkur á að eyðileggja ekki ímynd hestamennskunnar út á við. Við verðum að umgangast hvert annað af virðingu, sýna sanngirni og ábyrgðartilfinningu og hugsa áður en við tölum,“ segir Guðmundur Björgvinsson, knapi ársins, í skemmtilegu viðtali.

Tímamótauppgvötun á gangráðnum svokallaða hefur orðið þess að varpa betra ljósi á ræktun íslenskra hrossa. Rannsóknarhópurinn sem stóð að uppgvötuninni ritar skýra grein í blaðið og ráðleggur ræktendum hvernig þeir geta nýtt sér þessa nýju rannsóknir.

Ef Ísland gengur í Evrópusambandið blasir við að hestamennskan á Íslandi muni gjörbreytast. Höft á innflutning dýra yrðu afnumin og hver sem er gæti flutt inn hross til landsins frá aðildarríkjum. Hafa hestamenn áttað sig á því? Grein lögfræðingsins og hestakonunnar Karolu Schmeil er skyldulesning.

Í ár hlaut stórræktun Bergs Jónssonar og Olil Amble, að Syðri-Gegnishólum titilinn Ræktunarbú ársins. Í blaðinu er umfjöllun um þau ásamt tólf ræktunarbúum sem heiðruðu voru nú í lok árs.

„Mikilvægast er að greina orsakir áverkanna eins vel og auðið er því þar liggja tækifærin til úrbóta. Til að sjá þessi tækifæri gæti þurft að breyta viðhorfum en í öllu falli er nauðsynlegt að byggja á bestu fáanlegu þekkingu á hverjum tíma,“ segir Sigríður Björnsdóttir, dýralæknir hrossasjúkdóma hjá Mast. Hún fjallar ítarlega um niðurstöður heilbrigðisskoðana keppnis- og sýningarhrossa samkvæmt fyrirkomulaginu „Klár í keppni“ og leggur til lausnir til úrbóta.

Fyrir 100 árum fór heimspekingurinn Ludwik Wittgenstein í hestaferð um Ísland, með félaga sínum David Pinsent. Ferðin varð þeim félögum mikil uppljómun. Nú, öld síðar, var ferðin endurtekin og var Ray Monk, einn helsti fræðimaður um heimspekinginn með í för. Ferðasögurnar eru sagðar.

Dráttarhestabúskapur komst þó aldrei á hátt stig hérlendis. Spannar tímabil þess aðeins um 50 ár og varð aldrei að eiginlegri hefð eða menningu. Ágrip af sögu dráttarhestsins á Íslandi má nálgast í blaðinu.

Þetta og margt fleira í tvöfaldri jólaútgáfu Eiðfaxa!

Áskrifendur geta nú nálgast vefútgáfu blaðsins hér.