Landsmótssigurvegari á leið til Danmerkur

Landsmótssigurvegarinn Börkur frá Fákshólum er á leiðinni til Danmerkur í dag. Börkur stóð efstur í flokki sex vetra á Landsmótinu í sumar þar sem hann hlaut 8,47 í aðaleinkunn, sýndur af Eyrúnu Ýr Pálsdóttur. Börkur er undan Hreyfli frá Vorsabæ II og Djásn frá Ytra-Skörðugili II en ræktendur eru þau Sigurður Óli Kristinsson og Birna Káradóttir

Nýr eigandi Börks er Pernille Hounisen en hún á búgarðinn Stald Sjelborg Strand í Danmörku. Rúnar Þór Snorrason mun verða með hestinn í þjálfun en hann og Pernille hafa átt í farsælu samstarfi.

„Klárinn verður hjá mér í þjálfun á búgarði sem ég bý á en þau eiga, Stald Årup. Þar er verið að byggja þar núna 20 hestahús, stóra reiðhöll og löglegan hringvöll,“ segir Rúnar en Stald Årup er á Vestur Jótlandi, við Ringkøbing og bætir við að þau hlakka mikið til að fá klárinn til þeirra.