Gæðingamót Fáks: Spennandi keppni í B-flokki

Gæðingamót Fáks hófst í rigningunni í Víðidal í gær með forkeppni í B-flokki gæðinga.

Mjótt er á munum milli efstu keppenda. Sveigur frá Varmalandi og Hulda Gústafsdóttir hlutu hæstu einkunn 8,62 en jöfn í 2.-3. sæti eru Sylvía Sigurbjörnsdóttir á Þóri frá Hólum og Þorvaldur Árni Þorvaldsson á Smyril frá Hrísum með einkunnina 8,55. Sylvía stendur einnig í 8. sæti á Grun frá Oddhól og er þar með með tvö hross í úrslitum. Þá fékk systir Sylvíu, Sara Sigurbjörnsdóttir á Ögra frá Hólum einkunnina 8,48 og stendur í fjórða sæti og Róbert Petersen og Magni frá Reykjavík koma fast á hæla þeirra með 8,44. Jafnir í 6.-7. sæti er Árni Björn Árnason á Furu frá Enni og Sigurður Óli Kristinsson á Húna frá Reykjavík.

Úrslit í B-flokki fara fram á sunnudag kl. 13 en þá etja kappi átta efstu hrossin.

Í dag fara hins vegar fram forkeppnir í ungmennaflokki kl. 15.30 og A-flokki gæðinga kl. 19. 
Dagskrá mótsins má nálgast hér.