Sérfræðingurinn skapgóði – video-

Spuni frá Vesturkoti hlaut langhæsta dóm 5 vetra stóðhesta á Héraðssýningunni á Sörlastöðum á dögunum. Hann fékk 8,66 í aðaleinkunn, fyrir sköpulag 8,43 og glæsilega 8,82 fyrir hæfileika, þar af 9,5 fyrir skeið og vilja og geðslag.

Er dómurinn þriðji hæsti dómur sem 5 vetra stóðhestur hefur hlotið, á eftir dóm Þórodds frá Þóroddsstöðum frá 2004 og Olivers frá Kvistum frá 2009. Kemur því ekki á óvart að eftirspurnin eftir að fá að halda undir þessa hæfileikabombu er gríðarleg, enda segir Hulda Finnsdóttir í Vesturkoti að síminn hafi ekki stoppað síðan hann var sýndur í síðustu viku.

“Sem folald var Spuni strax mjög sérstakur í umgengni. Það vottaði aldrei fyrir hræðslu hjá honum, þvert á móti var hann forvitinn, gekk til manns í haganum og virtist velta hlutum fyrir sér,” segir Hulda Finnsdóttir í Vesturkoti. Þetta einstaka lundarfar folaldsins varð til þess að Spuni fékk viðurnefnið “Sérfræðingurinn”.

“Geðslagið er enn frábært. Í tamningu var hann fljótur að koma til. Hann er mjög gangsamur og fór strax að tölta og gerði allt sem hann var beðin um. Hann er í raun alger sérfræðingur!” segir Hulda en Ólafur Brynjar Ásgeirsson tamningamaður í Vesturkoti hefur haft umsjón með gæðingnum frá upphafi tamningar.

Nú þegar eru fædd þrettán afkvæmi undan Spuna og von er á tuttugu til viðbótar í vor. “Við settum t.a.m. eina af okkar bestu hryssum, Líf frá Þúfu, undir hann í fyrra og erum ofsalega spennt að sjá hvað kemur út úr þeirri pörun,” segir Hulda.

Spuni verður í Sandhólaferju í sæðingum í sumar. Fyrra gangmálið er frá 1. júní til 15. júní og það síðara frá 12. júlí til 20. ágúst.

Verðið fyrir folatollinn er 50.000 kr. með vsk. Þar sem hesturinn verður í sæðingum í Sandhólaferju þá þarf hryssueigandinn að greiða 50.000 kr gjald fyrir sæðinguna til dýarlæknisins í Sandhólaferju en inn í því gjaldi er sæðingin, uppihald hryssurnar og ótakmarkaður fjöldi sónarskoðana. Þetta þjónustugjald er Hryssueigendur þurfa ekki að láta sónarskoðana hryssur sínar áður en þær koma í Sandhólaferju, þeim gefst kostur á sónarskoðun þar. Hryssurnar verða síðan í umsjá þeirra í Sandhólaferju.

Þeir sem hafa í hyggju að halda undir Spuna er því bent á að hafa samband við Guðmar dýralækni í Sandhólaferju í síma 661-9112 eða Jakobínu  í síma 893-0698.

Meðfylgjandi er myndskeið af Spuna á yfirlitssýningunni á Sörlastöðum sl. sunnudag.