Stærsta Landsmótið til þessa

Á sunnudag var síðasti dagur fyrir hestamannafélögin til að skrá keppendur sína inn á Landsmót 2011 á Vindheimamelum. Helgin var annasöm hjá skráningarfólki en að sama skapi skemmtileg, því það er alltaf einhver hátíðarblær sem þess konar annríki hefur í för með sér og Landsmótið færist nær og nær í huga manns. Einnig voru síðustu forvöð um helgina sem leið, að vinna sér rétt til þátttöku í tölti og skeiðgreinum mótsins, svo það var handagangur í öskjunni þegar stöðulistar voru teknir saman í gær.

Í ljós kemur að fjöldi hrossa á landsmóti hefur aldrei verið meiri. Í gæðingahluta mótsins eru skráð 473 hross (sjá skiptingu í greinar í töflu 1). Í töltið og skeiðgreinarnar eru skráð 55 hross og í kynbótahlutann eru skráð hvorki meira nér minna en 249 hross, 120 stóðhestar og 129 hryssur (sjá fjölda í hverjum flokki í töflu 2).

Kynbótahrossinn sem náð hafa lágmörkum inn á landsmót, hafa aldrei verið fleiri. Ef litið er til mótsins 1990 á Vindheimamelum, hefur kynbótahrossum fjölgað um meira en helming en 119 gripir voru dæmdir á því móti. Þetta segir okkur það að kynbætur hrossastofnsins ganga vel, því fleiri og fleiri hross hljóta farmiða á landsmót (sjá töflu 3 fyrir þróun fjölda kynbótahrossa).

Það stefnir því allt í stærsta landsmótið í sögunni til þessa, a.m.k. ef litið er til fjölda gæðinga. Það eykur jú bara spennuna hjá hestamönnum að mæta í veisluna í Skagafirðinum!