Átta hross hlutu 1.verðlaun í Hafnarfirði

Síðsumarssýningu á Sörlastöðum í Hafnarfirði lauk í morgun með yfirlitssýningu. Alls voru 33 hross sýnd í fullnaðardómi og hlutu 8 þeirra aðaleinkunn yfir 8,00 og 1.verðlaun. Dómarar voru Eyþór Einarsson og Arnar Bjarki Sigurðarson.

Hæst dæmda hross sýningarinnar var Ljósálfur frá Syðri-Gegnishólum sem er 7.vetra gamall undan Álfadísi frá Selfossi og Lord frá Vatnsleysu. Hann hlaut 8,59 fyrir sköpulag og þar af 9,5 fyrir fótagerð og 9,0 fyrir bak og lend en hann hlaut sama sköpulagsdóm og á síðasta ári. Hann hækkaði hæfileikadóm sinn frá því í fyrra og hlýtur nú 8,31 fyrir hæfileika og þar af 9,0 fyrir tölt, hægt tölt, brokk, greitt stökk, samstarfsvilja og fegurð í reið. Sýnandi Ljósálfs var eigandinn og ræktandinn Olil Amble. Um Álfadísi þarf ekki að fjölyrða sem ræktunargrip en 13 afkvæmi hennar hafa mætt til dóms og er meðaltal aðaleinkunnar hvorki meira en 8,45.

Hæst dæmda hryssa sýningarinnar var Hvelfing frá Ásmundarstöðum 3 sýnd af Guðmundi Björgvinssyni. Hvelfing er undan Sjóði frá Kirkjubæ og Hvellhettu frá Ásmundarstöðum. Ræktandi og eigandi er Nanna Jónsdóttir. Hvelfin hlaut fyrir sköpulag 8,03 en fyrir hæfileika 8,52 og þar af 9,0 fyrir brokk, samstarfsvilja og greitt stökk.

Fullnaðardæmd hross raðað eftir aðaleinkunn