Dóttir geimfarans í starfsnámi á Íslandi

7. ágúst 2012
Fréttir

„Íslenski geimfarinn Bjarni Tryggvason kom til landsins í lok júlí til að sækja dóttur sína, Lauren Tryggvason sem dvalið hafði á Vatnsleysu í Skagafirði hjá þeim Birni og Arndísi í tvær vikur. Lauren er nemandi við dýralækningar í Royal Veterinary College í London, Bretlandi og þurfti að velja sér stað til að við vera við starfsnám í 2 vikur í sumar. Vegna áhuga hennar á hestum og uppruna föður hennar, var ákveðið að kynnast íslenskri hrossarækt og starfsemi á slíku búi. Á Vatnsleysu hefur verið stunduð markviss hrossarækt í áratugi, en á bakvið hvern einstakling þar er 45 ára ræktunarstarf.

Lauren var alsæl með dvölina á Íslandi og ákveðin í að koma fljótt aftur að Vatnsleysu. Að sögn Björns og Arndísar var hún afar áhugasöm um íslenska hestinn og duglegur starfskraftur. Áður en lagt var í hann frá Vatnsleysu fékk hún að fara í einn loka reiðtúr á stóðhestinum Andra frá Vatnsleysu. Var það mikil upplifun og ekki laust við að búið væri að kveikja verulega í áhuga hennar á íslenskum hestum. Svo mikinn reyndar, að hún stefnir að því að nýta sér hann sem viðfangsefni í verkefnum í náminu.“