Ekkert hross hlaut 10 fyrir stökk

Nú þegar kynbótasýningum árið 2022 er lokið þá er gaman að renna yfir níufimmur og tíur ársins í einstökum eiginleikum. Næsti eiginleiki sem við tökum fyrir hér á vef Eiðfaxa er stökk.

Ekkert hross hlaut 10,0 fyrir stökk á árinu en einungis þrjú hross hafa hlotið þessa einkunn Ljósvaki frá Valstrýtu (2016), Hylling frá Nýjabæ (1982) og Nös frá Urriðavatni (1977). Það hlutu hins vegar 10 hross 9,5 fyrir stökk en hér fyrir neðan er hægt að sjá lista með þeim hrossum. Öll hrossin voru sýnd á Íslandi, fyrir utan eitt, Arion fran Artinge.

Til þess að fá glögga mynd af því eftir hverju er verið að leita þegar eiginleikinn er metin er gripið niður í stigunarkvarða einstaklingadóma og lýsing á einkunninni 9,5-10 fyrir stökk er sem hér segir:

Greitt stökk
Stökk skal sýnt á þeim mesta hraða þar sem hesturinn ræður við að ganga í jafnvægi, þar sem hraðaaukning frá hægu upp í mestu ferð er sýnd. Greinileg hraðaaukning í góðu jafnvægi getur vegið til hækkunar á einkunn og eins ef sýnd er jafnvægisgóð niðurhæging. Full sprettlengd er 150 metrar (75 metrar hjá fjögurra vetra hrossum).

9,5 – 10
Taktgott, skrefmikið, afar mjúkt stökk með góðu svifi og miklu gegnumflæði og fjaðurmagni í hreyfingum. Hesturinn hreyfir sig í jafnvægi með háum, léttum hreyfingum og nær mikilli ferð. Hann lyftir sér vel að framan, kreppir afturhlutann og stígur langt inn undir sig. Hesturinn hefur burð í baki og langa og mjúka yfirlínu.