Fákur sendir magnaða gæðinga á Landsmót

Gæðingamót og úrtaka Hestamannafélagsins Fáks fór fram um helgina en um var að ræða fyrstu úrtöku ársins fyrir Landsmót Hestamanna. Fákur er fjölmennasta hestamannafélag landsins og á rétt á því að senda 16 þátttakendur í hvern og einn flokk í gæðingakeppni. Margir frábærir gæðingar og knapaur komu fram í úrtökunni sem líklegt er að blandi sér í baráttu um sigur á Landsmóti í sumar.

Boðið var upp á fyrri og seinni umferð þar sem fyrri umferð gilti til úrslita. Knaparnir gátu þó tryggt sér þátttökurétt með árangri í seinni umferð líkt og tíðkast hjá mörgum hestamannafélögum.

Mótið var sýnt í beinni útsendingu á EiðfaxaTV og er einnig aðgengilegt þar nú.

A-Flokkur

Í forkeppni var það Seðill frá Árbæ sýndur af Árna Birni Pálssyni sem hlaut hæsta einkunn, 8,82. Þeir mættu hins vegar ekki til úrslita en í þeim var það Kastor frá Garðshorni á Þelamörk sem efstur stóð með einkunnina 9,00 með knapa sínum Konráði Val Sveinssyni. Í öðru sæti varð Ambassador frá Bræðraá og Sigurður Vignir Matthíasson með 8,73 og í þriðja sætinu Seiður frá Hólum og Sveinn Ragnarsson með 8,55.

B-flokkur

Í flokki klárhesta lítur út fyrir að Fákur sendi einnig sterka sveit norður í Hjaltadalinn. Efst eftir forkeppni var Tesla frá Ásgarði vestri sýnd af Jóni Herkovic með einkunnina 8,75. Þau unnu einnig A-úrslit og þá með einkunnina 8,94. Í öðru sæti í úrslitum varð Hylur frá Flagbjarnarholti með 8,84 í einkunn sýndur af Teiti Árnasyni og í þriðja sæti varð Rökkvi frá Heysholti með 8,70 setinn af Heklu Katharínu Kristinsdóttur

B-flokkur áhugamanna

B-flokkur áhugamanna er í fyrsta skipti á dagskrá Landsmóts og var því úrtaka í þeim flokki hjá Fáki. Að lokinni forkeppni var það Vinur frá Sauðárkróki og Hrafnhildur Jónsdóttir sem efst stóðu með 8,59 í einkunn. Þau héldu sinni forystu í A-úrslitum og unnu þau. Önnur varð Kata frá Korpu og Garðar Hólm Birgisson með 8,47 og í þriðja sætinu Harpa frá Horni og Erla Katrín Jónsdóttir með 8,41.

B-flokkur ungmenna

Í B-flokki ungmenna var efst eftir forkeppni Lilja Rún Sigurjónsdóttir á Draupni frá Dimmuborg með 8,63 í einkunn. Annar var Matthías Sigurðsson á Tuma frá Jarðbrú með 8,59. Lilja mætti ekki á Draupni til úrslita en þar var það Tumi frá Jarðbrú og Matthías sem efstir stóðu með 8,99 en þeir unnu þennan flokk á Landsmóti 2024 og geta því varið titil sinn á Landsmót í sumar. Í öðru sæti í úrslitum varð Eva Kærnested á Styrki frá Skák með 8,74 og í þriðja sæti var Ragnar Snær Viðarsson á Hinriki frá Hásæti með 8,58.

A-flokkur ungmenna

Í þessum flokki var það Selma Leifsdóttir sem efst stóð að lokinni fyrri umferð á Dal frá Meðalfelli með 8,41 í einkunn. Hún stóð einnig efst í úrslitum með 8,33. Önnur varð Selma Dóra Þorsteinsdóttir á Tý frá Hólum og í þriðja sæti Bertha Liv Bergstað á Sporði frá Ytra-Dalsgerði

Unglingaflokkur

Í unglingaflokki var Viktor Leifsson efstur í forkeppni á Biskupi frá Hólum með einkunnina 8,55. Í A-úrslitum var það hins vegar Gabríel Liljendal Friðfinnsson á Ólsen frá Egilsá sem sigraði með 8,79. Annar varð Sigurður Ingvarsson á Liljari frá Varmalandi með 8,76 og í þriðja sæti Bertha Liv Bergstað á Hólma frá Kaldbak með 8,65 í í einkunn.

Barnaflokkur

Í barnaflokki gæðinga var það Helga Rún Sigurðardóttir á Safír frá Mosfellsbæ sem hæsta einkunn hlaut í forkeppni 8,75. Í úrslitum var það svo Valdís Mist Eyjólfsdóttir sem vann á Hnotu frá Þingnesi með 8,81 í einkunn. Í öðru sæti varð Svala Björk Hlynsdóttir á Bríeti frá Auðsholtshjáleigu með 8,72 og í þriðja sæti Alexander Þór Hjaltason á Tý frá Akranesi með 8,63.

Efstu hestar í A-flokki miðað við báðar umferðir

Efstu hestar í B-flokki hjá Fáki miðað við báðar umferðir

Efstu pör í B-flokki áhugamanna

Efstu pör í B-flokki ungmenna miðað við báðar umferðir

Efstu hestar í A-flokki ungmenna miðað við báðar umferðir

Efstu pör í unglingaflokki miðað við báðar umferðir

Efstu pör í barnaflokki miðað við báðar umferðir