Friðrik Már Sigurðsson býður sig fram fyrir Framsóknarflokkinn

Friðrik Már Sigurðsson skipar 4. sæti á lista Framsóknar í Norðvesturkjördæmi fyrir Alþingiskosningarnar 2021. Friðrik býr á bænum Lækjamóti í Húnaþingi vestra ásamt eiginkonu sinni, Sonju Lindal Þórisdóttur dýralækni, og tveimur börnum þeirra.

Hvað er að frétta?

Ég er nýkominn úr seinni göngum á Víðidalstunguheiði þar sem ég leita ásamt öðrum vöskum gangnamönnum stórt svæði á þremur dögum. Þar fer ég með gangastjórn og hef með mér vel valda hörku klára sem sjá um að gera verkið enn ánægjulegra. Þetta var kærkomin tilbreyting frá kosningaþeytingnum sem maður er búinn að vera á undanfarið enda er heiðin einn mest heillandi staður sem ég kem á.

Hver ertu?

Ég er fæddur og uppalinn Fáksmaður en með miklar og sterkar tengingar við Skagafjörðinn og var í Stíganda meðan ég bjó þar. Eftir að við hjónin festum rætur í Húnaþingi vestra 2014 skipti ég yfir í Hestamannafélagið Þyt og er nú stoltur félagi og stjórnarmaður í okkar samheldna og skemmtilega félagi.

Ég er menntaður reiðkennari frá Háskólanum á Hólum og hef lokið námi í búvísindum við Landbúnaðarháskóla Íslands og er nú í meistaranámi í verkefnastjórnun við Háskólann í Reykjavík. Ég er kynbótadómari, sveitastjórnarmaður, formaður byggðarráðs og bóndi. En að öllum öðrum hlutverkum ólöstuðum, þá held ég mest uppá föðurhlutverkið.

Er kynbótadómarastarfið ekki góður undirbúningur fyrir pólitíkina?

Jú það má eiginlega segja það. Það er virkilega skemmtilegt starf að vera kynbótadómari og hefur verið góður skóli á margan hátt. Ég byrjaði að dæma 2008 og hef lært mikið á þessum tíma, ekki síst hvað varðar samskipti, taka tillit til mismunandi sjónarmiða og bera virðingu fyrir tilfinningum fólks sem að málinu koma. Síðan þarf maður að hafa breitt bak og kunna að taka gagnrýni og því er alveg óhætt að segja að það sé mjög góður undirbúningur fyrir pólitíkina að starfa sem kynbótadómari.

Hvers vegna pólitík?

Ég hef áhuga á að bæta samfélagið og þegar mér bauðst tækifæri til að byrja í pólitík í sveitarstjórnarkosningum 2018 þá fann ég mikinn kraft innra með mér sem mig langaði til að nýta í þágu samfélagsins. Þá var ekki aftur snúið og ég hef einnig fengið ábyrgðarhlutverk á landsvísu. Þar á meðal fór ég með formennsku í nefnd um breytingar á fæðingarorlofslöggjöfinni sem samþykkt var á Alþingi í lok árs 2020. Ég hef trú á að ég hafi margt til málanna að leggja og ákvað því að gefa kost á mér núna til alþingiskosninga. Eini gallinn við pólitíkina er hvað hún tekur mikinn tíma frá mér úr hesthúsinu, að öðru leyti hef ég mjög gaman að þessu.

Hvernig sérðu fyrir þér framtíð íslenska hestsins?

Ég held að ævintýrið með íslenska hestinn sé rétt að byrja, enda er hann einstakur í sinni röð sem félagi, vinur og lífsförunautur. Jafnframt því að styrkja félagsleg tengsl milli fólks, eflir hann tengingu við náttúruna og skapar lífinu dýpt og tilgang. Ég sé fyrir mér tækifæri nú þegar fólk leitar sér afþreyingar og tengsla við náttúruna í vaxandi mæli.

Hrossarækt eins og annar búskapur er fullur af sköpunarkrafti og lífsgleði og hestamennska sem atvinnugrein er og verður mikilvæg. Miklar framfarir í ræktun, meðferð og tamingum á síðustu áratugum veita okkur traustan grunn til þess að geta eflt enn frekar þann vöxt sem hefur verið í greininni á undanförnum árum. Gríðarlegt tækifæri er í því að halda frammi sérstöðu Íslands og þegar bólusetningarnar fyrir sumarexeminu verða komnar í almenna notkun tel ég að áhuginn erlendis á hrossum fæddum á Íslandi muni aukast til muna og þá er betra fyrir ræktendur að vera tilbúnir með frambærilega vöru. Þess utan hefur hesturinn gríðarlegt aðdráttarafl og því eru áhrif hans á ferðaþjónustu á Íslandi ótvíræð. Enginn einn aðili dregur hingað til landsins jafn marga ferðamenn og íslenski hesturinn og því oft talað um hann sem besta sendiherrann. Íslenski hesturinn eykur veltu íslenska þjóðarbúsins og á því sinn þátt í að styrkja innviði og auka lífsgæði allra Íslendinga.

Hvers vegna ættu hestamenn að kjósa Framsókn?

Mig langar til að draga fram nokkur atriði sem annars vegar tengjast hestamennskunni sem íþrótt og hinsvegar sem atvinnugrein.

Við í Framsókn viljum að ríkið styðji við frístundir barna með árlegri 60 þúsund króna greiðslu til allra barna á aldrinum 6 til 18 ára. Þessi aðgerð vinnur að því að jafna tækifæri barna til virkrar þátttöku í íþrótta- og tómstundastarfi. Þannig að fleiri börn munu fá tækifæri til að prófa sig áfram í hestamennsku. Þarna er klárlega tækifæri til að efla nýliðun í hestamennsku og munum við enn betur geta stutt við unga fólkið okkar og fjölgað iðkendum til lengri tíma.

Framsókn vill líka styðja enn betur við afreksíþróttafólkið okkar með auknum framlögum til afreksíþróttasjóðs sérsambanda.

Þegar kemur að hestamennskunni sem atvinnugrein þá er ég sannfærður um að áherslur okkar hvað varðar lítil og meðalstór fyrirtæki munu hafa veruleg áhrif innan greinarinnar, sem og víðar. Við í Framsókn viljum taka upp þrepaskipt tryggingagjald og lækka það hjá litlum og meðalstórum fyrirtækjum. Samhliða viljum við taka fleiri þrep upp í tekjuskatti á fyrirtæki. Með þessu viljum við í Framsókn nota skattkerfið til að jafna aðstöðu fólks á landsbyggðinni, þannig að þau fyrirtæki sem staðsett eru utan skilgreindra svæða njóti skattalegra ívilnana vegna staðsetningar sinnar. Þessar aðgerðir hafa umtalsverð jákvæð áhrif á rekstur lítilla fyrirtækja á landsbyggðinni. Þannig að um er að ræða töluverða jákvæða breytingu á rekstarumhverfi margra hestatengdra fyrirtækja.

Þetta er bara brot af okkar áherslumálum, en ég hvet alla að kynna sér vel áherslur framboðanna áður en þeir gera upp hug sinn á kjördag. Svo vil ég að lokum biðla til lesenda um að þeir kjósi og taki virkan þátt í lýðræðinu.

Við þökkum Friðriki kærlega fyrir spjallið og óskum honum alls hins besta í komandi kosningum