Gabríel og Isi-Pack sigra í Meistaradeild Líflands og æskunnar

Síðasta mótið í Meistaradeild Líflands og æskunnar fór fram á félagssvæði Hestamannafélagsins Fáks í gærkvöldi þar sem keppt var í gæðingaskeiði. Að móti loknu var svo verðlaunaafhending þar sem efstu knapar og lið voru heiðruð. Alls var keppt í sex greinum í vetur; Fjórgangi, slaktaumatölti, gæðingalist, fimmgangi, tölti og gæðingaskeiði.

Sýnt var frá öllum mótunum í beinni útsendingu á EiðfaxaTV og var það okkur heiður að gera þessum framúrskarandi ungu knöpum hátt undir höfði, þökkum við áhorfendum samfylgdina í vetur sem og öllum þeim sem komu að vinnu í kringum deildina.

Gabríel og lið Isi-Pack heildarsiguvegarar

Í einstaklingskeppninni er það Gabríel Liljendal Friðfinnsson sem vann heildarsigur með 44 stig. Hann sýndi fram á það hversu fjölhæfur knapi hann er með því að taka þátt í öllun sex greinum og það á sex mismunandi hrossum. Hann varð annar í fjórgangi á Litríki frá Miðengi með 6,87, Keppti í slaktaumatölti á Þokka frá Egilsá þar sem hann hlaut 6,17 og 13.-14.sæti. Tók 2. sætið í gæðingalist á Ólsen frá Egilsá með 6,93 í einkunn, sigraði keppinauta sína í fimmgangi á Fiðlu frá Egilsá með einkunnina 6,74. Keppti í tölti á Byrjun frá Halakoti og varð í áttunda sæti með 6,39. Endaði svo mótaröðina á að verða í 2.-3 sæti í gæðingaskeiði á Jökli frá Stóru-Ásgeirsá með 6,25 í einkunn. Flottur árangur hjá Gabríel og færum við honum hamingjuóskir með sigurinn. Í öðru sæti í einstaklingskeppni varð Álfheiður Þóra Ágústsdóttir með 35,5 stig og í því þriðja Elimar Elvarsson með 27 stig.

1. Gabríel Liljendal Friðfinnsson – 44 stig
2. Álfheiður Þóra Ásgeirsdóttir – 35,5 stig
3. Elimar Elvarsson – 27 stig.

Í liðakeppninni var það svo lið Isi-Pack sem vann heildarsigur. Liðsmenn þess eru áður nefndir Gabríel og Elimar en auk þeirra voru í liðinu þær Elsa Kristín Grétarsdóttir og Jórunn Edda Antonsdóttir. Allir liðsmenn stóðu sig vel í vetur og vann liðið heildarsigur í fjórum greinum af sex þ.e. fjórgangi, gæðingalist, fimmgangi og tölti. Hlutu þau alls 439,5 stig og nokkuð öruggan sigur. Í öðru sæti varð lið Top Reiter með 336 stig og í því þriðja lið Hringdu/Toyota Selfossi með 335,5 stig.

1. Isi-Pack – 439,5 stig
2. Top Reiter – 336 stig
3. Hringdu/Toyota Selfossi

Lið Isi-Pack sigurvegari í liðakeppni. F.v. Gabríel Liljendal Friðfinnsson, Elimar Elvarsson, Jórunn Edda Antonsdóttir og Elsa Kristín Grétarsdóttir.

Ragnar Dagur sigurvegari í gæðingaskeiði

Í gæðingaskeiði var það Ragnar Dagur Jóhannsson sem vann á hryssunni Urlu frá Pulu en hlutu þau í einkunn 6,33. Jöfn í 2.-3. sæti með einkunnina 6,25 voru þau Bertha Liv Bergstað á Borgari Búa frá Árbæjarhjáleigu og Gabríel Liljendal Friðfinnsson á Jökli frá Stóru-Ásgeirsá. Í gæðingaskeiði var það svo lið Top Reiter sem tók liðaskjöldinn.

Ragnar Dagur og Urla frá Pulu sigurvegarar í gæðingaskeiði Meistaradeildar Líflands og æskunnar.

Niðurstaða gæðingaskeið