Glíma frá Bakkakoti mætir á Fáka og fjör
Frá Hestamannafélaginu Létti á Akureyri berast þær fréttir að stutt sé í Fáka of fjör, stórveislu hestamanna á Akureyri en hátíðin fer fram laugardaginn 14. apríl og hefst kl. 18 í TopReiterhöllinni.
Dagskráin er þétt og úrval góðra hrossa kemur þar fram. Fyrstar skal telja hæfileikabomburnar og alsysturnar Glímu frá Bakkakoti og Spá frá Eystra-Fróðholti. Þessar stöllur skarta mörgum 9 og 9,5 í hæfileikum sínum. Ársæll bóndi lætur þó ekki þar við sitja og kemur með enn eitt Sæsafkvæmið en Óðinn frá Eystra-Fróðholti mun einnig mæta í höllina. Höfðinginn Aron frá Strandarhöfði mætir ásamt nokkrum afkvæmum sínum. Þar á meðal skal telja þá Seif frá Prestsbakka, Arnar frá Blesastöðum og Þey frá Prestsbæ. Hestagullið og Leiknisdóttirin Flétta frá Árbakka mætir á sýninguna, keppnishrossabúið Efri-Rauðilækur verður með sýnishorn af sinni keppnishrossaræktun og ræktunarbú HEÞ, Ytri-Bægisá I, skartar einnig flottum hópi. Þetta og mun meira verður í boði á Fákum og fjöri á laugardaginn. Meira þegar nær dregur. Forsala miða hefst á morgun í Fákasport og Líflandi á Akureyri og kostar miðinn 2500 kr. en frítt er fyrir 12 ára og yngri.
Mögnuð fjölskylduskemmtun fyrir allt hestaáhugafólk.
Verið velkomin á Fáka og fjör 2012.
Til minningar um Rúnar Geir Ólafsson 
Vigdís Matthíasdóttir ráðin yfirþjálfari Hæfileikamótunar LH 