Háar einkunnir þarf til þess að eiga þátttökurétt á Landssýningu

Landssýning kynbótahrossa fer fram laugardaginn 27.júní á Rangárbökkum við Hellu. Þátttökurétt í sýningunni eiga tíu hæst dæmdu kynbótahross vorsins í öllum flokkum hryssna og stóðhesta, alls 80 bestu hross landsins. Hrossin verða kynnt ítarlega og verðlaunuð á grunni dóma vorsins.

Á Landssýningunni verða einnig afkvæmasýningar stóðhesta til 1.verðlauna fyrir afkvæmi og einnig til heiðursverðlauna.

Landssýningin verður í beinni útsendingu á þremur tungumálum hér á vef Eiðfaxa. Það er Félag Hrossabænda, RML og Horses of Iceland sem standa einnig að landssýningunni.

Nú er tveimur vikum í sýningum lokið og hafa alls 368 hross verið sýnd í fullnaðardómi. Spennan eykst um hvaða hross það eru sem komast á Landssýninguna og fá þannig kynningu um gjörvalla veröld í gegnum streymi auk þess að vera verðlaunuð.

Á morgun, mánudag, hefjast sýningar á fjórum stöðum en það er í Víðidal, á Hellu, Hólum og á Sörlastöðum og eftir þá viku verður ljóst hvaða hross mæta á Landssýninguna.

Við minnum eigendur kynbótahrossa að þeir geta tryggt sér myndband af sínu hrossi í kynbótadómi með því að senda email á [email protected] þar sem fram kemur nafn viðkomandi stóðhests eða hryssu og hvar hún var sýnd. Myndbandið kostar 15.000 + vsk en það er í bestu hugsanlegu gæðum og sáu fremstu fagmenn í faginu um upptöku á hverjum sýningarstað.

Stöðulistar í öllum aldursflokkum