Heimild til að nota eyrnatappa meðal þess sem er nýtt af nálinni

Á vefsíðu LH er tilkynning um það að þær breytingar sem samþykktar voru á landsþingi LH 2020 og á FEIF-þingi 2021 hafa verið færðar inn í lög og reglur LH sem birt eru á vef LH.

Helstu breytingar sem gerðar voru á lögunum á landsþingi eru eftirfarandi:

• Þátttökurétt á Íslandsmóti eiga efstu pör á stöðulista og fjöldi í hverri grein er takmarkaður.
• Í gæðingakeppni er ný keppnisgrein, gæðingatölt.
• Í gæðingakeppni er óheimilt að taka baug eða snúa við eftir að keppandi hefur lagt af stað í skeiðsýningu.
• Árangur knapa í innahússmótum telur til árangurs keppnisárs ef vallarstærð er að lágmarki 19x50m.
• Einkunn fyrir stjórnun og ásetu er gefin eftir hvert atriði í barnaflokki í gæðingakeppni.
• Auglýsa skal opin íþróttamót og sækja skal um dómara með 7 daga fyrirvara.
• Reglur um aðstæður til skeiðkappreiða til að lágmarka slysahættu.
• Ekki er keppt í A-flokki ungmenna á landsmótum.
• Í gæðingakeppni getur sami hestur aðeins keppt í einum flokki á sama móti.

Helstu breytingar sem gerðar voru á FEIF-þingi og voru færðar inn í lög LH eru eftirfarandi:

• FEIF líður ekki mismunun byggða á uppruna, kyni, þjóðerni, trúar-og stjórnmálaskoðunum, kynhneigð, húskaparstöðu eða á öðrum grunni.
• Reiðhjálmar skulu vera með CE vottun eða sambærilega vottun.
• Hnakkur skal vera staðsettur þannig að meiri hluti gjarðar hvíli á bringubeini og hnakkur sitji hvorki á herðum hests né þungi hans hvíli á spjaldhryggssvæði.
• Regla um hversu mikið má herða nefól á reiðmúl og það skuli mæla með sérstöku mælitæki (e. Noseband Taper Gauge).
• Í íþróttakeppni er sama hesti heimilt að hefja keppni oftar en einu sinni á sama móti í sömu keppnisgrein ef það er í mismunandi aldursflokkum.
• Heimild til að nota ýmsan aukabúnað í keppni eins og snjóbotna, ísfjaðrir, eyrnartappa og verndandi gel eða áburð ofan hófbotns (e. liquid bandage).
• Regla um hvernig skuli reikna samanlagðan sigurvegara ef hestar eru jafnir að stigum.
• Við ræsingu með rásbásum skulu básar vera lokaðir að framan og aftan.
• Skerpt er á orðalagi um ræsingu og niðurtöku í gæðingaskeiði.
• Ný grein PP3, léttara gæðingaskeið.