Jón Ársæll og Viskusteinn efstir ungmenna

Norðurlandamótið hófst nú í morgun og er í beinni útsendingu á EiðfaxaTV, í dag er keppt í forkeppni í gæðingakeppni.

Önnur keppnisgrein dagsins var forkeppni í B-flokki ungmenna. Ísland átti þar fjóra fulltrúa en alls tóku 17 knapar þátt í greininni.

Efstur að lokinni forkeppni er Jón Ársæll Bergmann á Viskusteini frá Íbishóli með einkunnina 8,68, fast á hæla hans fylgir Hekla Rán Hannesdóttir á Tindi frá Árdal með 8,61 í einkunn. Í þriðja sætinu er Elsa Lund Iskov á Þormari frá Neðri-Hrepp með 8,46 í einkunn en þau eru fulltrúar Noregs.

Þau Sara Dís Snorradóttir og Guðmar Hólm Líndal tryggðu sér þátttökurétt í B-úrslitum þar sem þau munu berjast um að komast í A-úrslit og eru þau til alls líkleg. Sara er á Nökkva frá Syðra-Skörðugili og hlutu þau í einkunn 8,28 og þrettánda sætið og Guðmar er á Arthúri frá Baldurshaga og hlutu þeir 8,35 og níunda sætið.

B-úrslit fara fram á morgun, miðvikudag og A-úrslit í fara svo fram seinni parinn á fimmtudag.

Hægt er að nálgast allar niðurstöður, ráslista og annað á snjallforritinu HorseDay.